Sherzat Polatqa qatysty sot otyrysy advokattyń kesirinen kesh bastaldy
TALDYQORǴAN. KAZINFORM – 16 jastaǵy Sherzat Polattyń ólimine qatysty is boıynsha basty sot otyrysy 40 mınýtqa keshigip bastaldy.
Jetisý oblysynyń qylmystyq ister jónindegi mamandandyrylǵan aýdanaralyq sotynyń sýdıasy Erjan Januzaqov aıyptalýshylardyń biriniń múddesin qorǵaıtyn advokat Qalıevaǵa keshigip kelgeni úshin eskertý jasady.
Sherzat isi boıynsha naqty 9 kúdikti bar, onyń ishinde bir jasóspirim aýyr qylmys týraly habarlamaǵany úshin aıyptalyp jatyr.
Abzal Shynasyl — adam óltirý jáne buzaqylyq jasaǵany úshin aıyptaldy. Ravıl Saqıev — kisi óltirýge oqtalý jáne buzaqylyq boıynsha aıyptaldy. Shyńǵys Belǵojaev, Darhan Áskentaı, Nurqııas Ilıasov, Nurbol Toqtaýbaev men Azamat Toqtaýbaev, Dıdar Qalıahmet — buzaqylyq boıynsha, al kámeletke tolmaǵan Dýman Ysqaq — aýyr qylmys týraly habarlamaǵany úshin aıypty dep tanylyp otyr.
Aıta keteıik, 10 sáýir kúni Taldyqorǵanda Sherzat Polattyń ólimi týraly is boıynsha aldyn ala tyńdaý ótken bolatyn.
Onyń barysynda, 16 jastaǵy Sherzat Polatty aıýandyqpen óltirdi dep aıyptalǵandar alqabıler sotynan bas tartty.
Sondaı-aq Prokýror sotalýshylardyń árqaısysyna QR Qylmystyq kodeksiniń qaı baptary boıynsha aıyp taǵylǵanyn oqydy.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵanbyz.
Keıin ashýly talǵarlyqtar jasóspirim ólimine baılanysty narazylyqqa shyqty.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
15 qazan kúni Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatyldy. Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy.
2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.
Bas prokýrordyń orynbasary Ǵalymjan Qoıgeldıev Sherzat Polattyń úıiniń órtenýine qatysty tergeýdiń jańa málimetterin aıtty.