Sherzat Polat soty: prokýror oqıǵanyń tolyq hronologııasyn baıandady

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda 16 jastaǵy Sherzat Polattyń ólimine baılanysty sot otyrysy ótti.

Sot otyrysynda prokýror 2024 jyly 3-shi qazannan 4-ine qaraǵan túni bolǵan oqıǵanyń hronologııasyn aıtyp, 9 sottalýshy — Abzal Shynasyl, Ravıl Sákıev, Shyńǵys Belǵojaev, Darhan Áskentaı, Nurbol Toqtaýbaev, Nurqııas Іlııasov, Azamat Toqtaýbaev, Dıdar Qalıahmet, Dýman Ysqaqqa qandaı aıyp taǵylǵanyn baıandady.

Memlekettik aıyptaýshynyń baıandamasyna sáıkes oqıǵa hronologııasy kelesideı bolǵan:

2024 jyly 3 qazan saǵat 23:22. D.Áskentaı masań kúıde bola tura Talǵar qalasy Mendeleev kóshesi, 13 mekenjaıynda ornalasqan «Qamajaı» dúkenine kirip, 3 bótelke syra jáne 4 dana temeki alyp, óziniń tanysy kámeletke tolmaǵan Áskerbekke WhatsApp messendjeri arqyly tólem jasaý úshin habarlasyp, dúken sóresinde jazylyp turǵan nómerge 1 myń teńge aýdarýdy ótingen. Al Áskerbek óz kezeginde apasynyń esepshotynan 1 teńge aýdaryp, elektrondy chekti Áskentaıdyń WhatsApp messendjerine jibergen. Sodan keıin Áskentaı satýshy Nurymovqa elektrondy chekti kórsetip, sonymen qosa qolma-qol 1 myń teńge bergen. 530 teńge qaldyq aqshasyn alǵannan keıin Áskentaı dúkennen shyǵyp ketken.

Saǵat 23:33. Dúkenge Sherzat Polat kirip, óz telefonyn qýattaǵyshqa qoıyp, sonda otyrǵan.

Saǵat 23:47. Áskentaı dúkenge qaıta kirip, telefonyn qýattaǵyshqa qoıýdy ótingen. Odan keıin dalaǵa shyǵyp syra ishýin jalǵastyrǵan. Sh. Polat Áskentaıdyń is-áreketin muqııat baqylaǵan.

Saǵat 23:52. Kámeletke tolmaǵan Polat óziniń ákesine qatysty balaǵat sózder aıtty degen sebeppen Áskentaıdy eki ret urǵan. Mán-jaıdy dúken ishinen baqylap turǵan Nurymov balasyna eskertý jasap, dúkennen sý alyp, qandy jýýǵa kómektesip, balasynyń áreketi úshin keshirim suraǵan jáne densaýlyǵyna kelgen zaqymdy ótep beretinin jetkizgen. Alaıda Áskentaı bul sózge qulaq aspaı óziniń tanysy N.Toqtaýbaevty dúkenge habarlasyp shaqyrǵan.

Saǵat 00:06. Talǵar qalasynda kafede demalyp otyrǵan N.Toqtaýbaev tanysy Ysqaqty alyp, sonyń kóligimen «Qamajaı» dúkeniniń aldyna kelip, Áskentaıdan mán-jaıdy surastyrǵan. Óz kezeginde Q.Nurymov D.Áskentaıdyń adam shaqyryp jatqanyn kórip, oryn alǵan jaǵdaıdy shıelenistirmeı sheshý úshin týǵan inisi Ǵaıypbaevty shaqyrǵan.

Ǵaıypbaev dúkenge kóligimen jalǵyz ózi kelgen. Ári qaraı dúken aldynda turǵan Áskentaı men Toqtaýbaev Ǵaıypbaevqa óz narazylyqtaryn aıtqan. Ǵaıypbaev inisi Polat 16 jasta ekenin, balalyqpen kóp nárse túsinbeı Áskentaıdy uryp jibergenin aıtyp, onyń áreketteri úshin ózi keshirim suraǵan. Sonymen qatar mán-jaıdy tolyq bilmeı Áskentaıdyń ózin kinálap, 1,5 myń teńge tólemeı ketkenin aıtqan. Toqtaýbaev Áskentaıdyń kinásin túsinip, Ysqaqtyń basqarýyndaǵy kólikpen Áskentaımen birge ketip qalǵan.

Jolda Áskentaı 1 myń teńge tólem jasalǵanyn aıtyp, elektrondy chekti kórsetken. Toqtaýbaev aqsha tólengenine kózi jetip, «Qamajaı» dúkenine qaıta kelgen. Ári qaraı Toqtaýbaev satýshy Nurymovtan sońǵy tólemderdi kórsetýdi talap etken. Nurymov Svetlana esebinen tek 1 myń teńge túskenin kórsetken. Sol jerde Toqtaýbaev dosy Áskentaıdyń tólemeı ketti degen aqshasyn, ıaǵnı 1,5 myń teńgeni aýdarǵan. Osy ýaqytta Nurymov dúken aldynda turǵan Áskentaıdyń áreketine ashýlanyp, oǵan kassada turǵan ashana pyshaǵyn alyp umtylǵan. Alaıda Polat ákesiniń aldynan shyǵyp, ony sabyrǵa keltirip, dúkenge qaıta kirgizip jibergen.

Osy ýaqytta Nurbol Toqtaýbaev óziniń baýyry Azamat Toqtaýbaev jáne tanystary Abzal Shynasyl, Ravıl Sákıev, Shyńǵys Belǵojaev, Nurqııas Іlııasov kafede otyrǵanyn bilip, olardy atalǵan dúkenge shaqyrǵan. Óz kezeginde Belǵojaev, Shynasyl, Sákıev, Іlııasov jáne Toqtaýbaev aldyn ala sóz baılasyp, pyshaqtardy daıyndap, masań kúıde «Qamajaı» dúkenine Belǵojaevtyń basqarýyndaǵy kólikpen bet alǵan. Olarmen birge qyzdar Nurbekova men Jaqsygeldi de bolǵan. Shynasyl tanysy Áshirbaevtyń kóligimen olardyń artynan júrip otyrǵan.

Saǵat 00:34. Sh. Polat shaqyrtýymen onyń dostary «Qamajaı» dúkeniniń aldynda jaldamaly kólikpen kelgen. Sol arada syra satyp alý úshin Qalıahmet, Ábdirqadir jáne Muratov dúkenge kirgen.

Saǵat 00:38. «Qamajaı» dúkeniniń aldynda Belǵojaev kóligimen Sákıev, Іlııasov, A.Toqtaýbaev jáne qyzdar Nurbekova men Jaqsygeldi kelgen. Olardyń artynan Shynasyl jetken. Ony jetkizip tastaǵan Áshirbaev oqıǵa ornynan ketip qalǵan.

Osy ýaqytta dúken aldynda Sh. Polat, onyń aǵasy N.Ǵaıypbaev jáne dostary turǵan. Ekinshi jaqtan N.Toqtaýbaev, Áskentaı, Ysqaq turǵan. Al Sherzattyń ákesi Nurymov dúkenge kirip-shyǵyp júrgen. Dúken ishinde Qalıahmet bolǵan.

A.Shynasyl birinshi bolyp Sherzattyń kámeletke tolmaǵan dosyn urǵan. Tóbeles bastalǵanyn túsingen Sh. Polat jaqtastary oqıǵa ornynan qashyp ketken.

Osy ýaqytta Nurymov aıqaı-shýdy estip, kassadan pyshaq alyp, dúken aldyna shyqqan. Sol sátte Qalıahmet Nurymovty qolynan ustap alǵan. Al Belǵojaev dúken esigin aıaqpen teýip, ony qaıta kirgizip jibergen. Dúkenniń soltústik-batys tusyndaǵy aǵash janynan 16 kalıbrli ańshylyq myltyqty ustaǵan tulǵa Áskentaı jaqtastary turǵan jaqqa atqan. Oq adamdarǵa tımegen.

Saǵat 00:42. Oqıǵa ornyna Sherzattyń anasy Bıshımbıeva men ájesi Kadırova jaldamaly kólikpen kelgen. Al tóbeles kezinde Shynasyl ózimen aldyn ala alyp kelgen as pyshaǵyn paıdalanyp, Polat pen Ǵaıypbaevty óltirýge bekingen. Ol kámeletke tolmaǵan Sh. Polattyń sol jaq júrek tusyna as pyshaǵyn suǵyp alǵan.

Osy ýaqytta Sákıev Ǵaıypbaevqa bótelke laqtyryp (tımegen), keıin oǵan soqqy jasaǵan. Qalıahmet te jábirlenýshiniń aǵasyn urýǵa tyrysqan. A.Toqtaýbaev pen N.Іlııasov ta oǵan birneshe ret pyshaq siltep, biraq tıgize almaǵan. Dúken ishinen shyǵýǵa tyrysqan Nurymovty sottalýshylardyń biri bótelkemen betinen urǵan.

Dúkenge qaraı bara jatqan Sherzattyń ájesi Kadırovany Shynasyl ıterip qulatqan. Sodan keıin balasyna qaraı bara jatqan Bıshımbıevany Shynasyl men Іlııasov qolynan ustap, jibermeı qoıǵan.

Sol kezderi Ǵaıypbaev inisiniń «Nurqanat aǵa, maǵan birdeńe suǵyp aldy» degen daýsyn estip, oǵan barǵan jáne dene jaraqatyn kórip «Skoryı» dep kómekke shaqyrǵan.

Sol kezde Bıshıbıeva ózine balasyna baryp, ony otyrǵan jerinen qushaqtaǵan. Belǵojaev oǵan qaramastan Polatty basynan teýip, báki pyshaǵynyń sabymen birneshe ret urǵan. Іlııasov jerde jatqan ańshylyq myltyqty alyp, onyń sabymen Polatty uramyn dep jasóspirimniń anasyna soqqy jasaǵan. Onymen shektelmeı Áskentaı, Belǵojaev, Toqtaýbaev, Sákıev, Іlııasov qol-aıaqtarymen jerde jatqan Ǵaıypbaev pen Polatty uryp-soqqan.

Saǵat 01:02–01:04. Shynasyl Ǵaıypbaevty óltirý úshin onyń jambas tusyna pyshaq suǵyp alǵan. Sol sátte Sákıev Ǵaıypbaevtyń oń jaq jambas tusyna eki ret pyshaq suqqan. Bul áreketterdiń saldarynan Ǵaıypbaev esinen tanyp qalǵan. Muny kórgen Shynasyl men Sákıev ony óltirdik dep oılaǵan.

Tóbeles kezinde Ǵaıypbaevtyń telefony jerge túsip qalǵan. Quny 220 myń teńge turatyn telefondy A.Toqtaýbaev jymqyryp ketken. Osy oqıǵalardan keıin tóbeleske qatysýshylar oqıǵa ornynan kólikke minip ketip qalǵan. Ysqaq óz kóligimen olardyń artynan erip ketken.

Al Nurymov óz kóligine balasy men inisin salyp, olardy Talǵar aýdandyq aýrýhanasyna jetkizgen.

4 qazan tańy. Ysqaq áleýmettik jeliden «Qamajaı» dúkeni mańynda bolǵan tóbelesten Sh. Polat qaıtys bolǵanyn bilse de, qylmys týraly quzyrly organdarǵa habarlamaǵan.

Prokýror sottalýshylardyń árqaısysyna QR Qylmystyq kodekstiń qaı baptary boıynsha aıyp taǵylǵanyn atap ótti. 

— Abzal Shynasyl Qylmystyq kodekstiń 293-baby 3-bóligi (buzaqylyq), 99-bap 2-bóligi 1,4,7, 9,14-tarmaqtary (adam óltirý), 24-bap 3-bóligi (qylmysqa daıyndalý jáne qylmysqa oqtalý);

— Ravıl Sákıev Qylmystyq kodekstiń 293-baby 3-bóligi (buzaqylyq), 24-bap 3-bóligi (qylmysqa daıyndalý jáne qylmysqa oqtalý), 99-bap 2-bóligi 7,9-tarmaqtary (adam óltirý);

— Shyńǵys Belǵojaev, Nurqııas Іlııasov, Darhan Áskentaı, Nurbol Toqtaýbaev, Dıdar Qalıahmet, Azamat Toqtaýbaev Qylmystyq kodekstiń 293-baby 3-bóligi (buzaqylyq).

— Kámeletke tolmaǵan Dıdar Ysqaq Qylmystyq kodekstiń 434-baby (qylmys týraly habarlamaý) boıynsha aıyp taǵylyp otyr.

Eske salaıyq, byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik. 

Keıin ashýly talǵarlyqtar jasóspirim ólimine baılanysty narazylyqqa shyqty. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy. 

Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan. 

Bas prokýrordyń orynbasary Ǵalymjan Qoıgeldıev Sherzat Polattyń úıiniń órtenýine qatysty tergeýdiń jańa málimetterin aıtty.