Sherzat Polat isi: Sýdıa otyrysty Taldyqorǵannan Almatyǵa kóshirýden bas tartty
TALDYQORǴAN. KAZINFORM — Taldyqorǵanda kisi qolynan qaza tapqan jasóspirim Sherzat Polattyń isi boıynsha sot protsesi jalǵasyp jatyr.
Sot otyrys barysynda aıyptalýshylardyń biriniń múddesin qorǵaǵan advokat Ábenov sottan isti Almatyǵa aýystyrýdy surady. Onyń aıtýynsha, otyrystardy qalalyq tergeý ızolıatorynda ótkizý tıimdirek, óıtkeni bul kóptegen qatysýshy úshin logıstıkalyq turǵydan yńǵaıly.
Mundaı usynysty jábirlenýshi taraptyń advokaty Shekeev te aıtty. Ol Taldyqorǵanǵa jol uzaq ekenin alǵa tartyp, eger protsess Almatyǵa aýystyrylmasa, onlaın qatysýǵa ruqsat surady.
Sherzattyń ájesi de uzaq jolda qan qysymy kóteriletinin jetkizip, sýdıadan sotty kóshirýdi ótindi.
Sýdıa Erjan Januzaqov oǵan sot protsesine qatysýdan bosatý týraly ótinish jazýǵa bolatynyn aıtty.
— Alty advokat bar. Eger bir-ekeýińiz qatysa almasańyzdar da, sotty jalǵastyra beremiz. Onlaın qatysýǵa múmkindik joq, óıtkeni translıatsııa júrip jatyr. Onlaında sizderdiń daýystaryńyz estilmeı qalýy múmkin nemese tehnıkalyq aqaýlar týyndaýy yqtımal, — dedi Erjan Januzaqov.
Sýdıa áýel bastan isti qaraý orny retinde Taldyqorǵan qalasy belgilengenin jáne bul sheshim kúshinde qalǵanyn eske saldy.
Sherzat isi boıynsha naqty 9 kúdikti bar, onyń ishinde bir jasóspirim aýyr qylmys týraly habarlamaǵany úshin aıyptalyp jatyr.
Abzal Shynasyl — adam óltirý jáne buzaqylyq jasaǵany úshin aıyptalyp otyr. Ravıl Saqıev — kisi óltirýge oqtalý jáne buzaqylyq boıynsha aıyptaldy. Shyńǵys Belǵojaev, Darhan Áskentaı, Nurqııas Ilıasov, Nurbol Toqtaýbaev men Azamat Toqtaýbaev, Dıdar Qalıahmet — buzaqylyq boıynsha aıyptalyp jatyr. Al kámeletke tolmaǵan Dýman Ysqaq — aýyr qylmys týraly habarlamaǵany úshin aıyptalyp otyr.
Aıta keteıik, 10 sáýir kúni Taldyqorǵanda Sherzat Polattyń ólimi týraly is boıynsha aldyn ala tyńdaý ótken bolatyn.
Onyń barysynda, 16 jastaǵy Sherzat Polatty aıýandyqpen óltirdi dep aıyptalǵandar alqabıler sotynan bas tartty.
Sondaı-aq Prokýror sotalýshylardyń árqaısysyna QR Qylmystyq kodeksiniń qaı baptary boıynsha aıyp taǵylǵanyn oqydy.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵanbyz.
Keıin ashýly talǵarlyqtar jasóspirim ólimine baılanysty narazylyqqa shyqty.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
15 qazan kúni Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatyldy. Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy.
2024 jyldyń jeltoqsan aıynda Talǵar mańynda Sherzat Polattyń aǵasynyń denesi tabyldy.
Bas prokýrordyń orynbasary Ǵalymjan Qoıgeldıev Sherzat Polattyń úıiniń órtenýine qatysty tergeýdiń jańa málimetterin aıtty.