Sherzat Polat isi: Іlııasov myltyqpen urý sebebin túsindirdi

TALDYQORǴAN. KAZINFORM – Sherzat Polattyń ólimine baılanysty Jetisý oblysynyń mamandandyrylǵan aýdanaralyq sotynda qaralyp jatqan qylmystyq is aıasynda sottalýshy Nurqııas Іlııasovtan jaýap alyndy.

Sotta Іlııasov 2024 jylǵy 3 qazannan 4 qazanǵa qaraǵan túni dosy Ravıl Sakıevpen birge «Eıforııa» meıramhanasynda bolǵanyn aıtty.

Onyń aıtýynsha, meıramhanaǵa keıinnen Dana men Elmıra, artynan Darhan, Azamat jáne Shyńǵys kelgen.

«Biz kóńil kóterip otyrǵan ýaqytta Nurbol men Dýman meıramhanaǵa keldi. Keıin olar shyǵyp ketti, biraq qaıda ketkenderin bilmeımin. Meıramhana jabylar kezde Azamat álde Shyńǵys «Nurboldy uryp ketipti, baryp kómekteseıikshi» dedi. Barlyǵymyz kólikpen «Qamajaı» dúkenine keldik. Onda bir top jasóspirim boldy. Ne bolǵanyn bilý úshin jandaryna baryp: «Jigitter, ne bolyp qaldy? Ne sebeppen uryp qoıdyńdar?» dep suradym. Sol kezde Sherzat Polat meni uryp jiberdi», – dedi sottalýshy.

Sot barysynda Іlııasov oqıǵa ornynda eki ret myltyq atylǵanyn, sondaı-aq Qarjaýbaıdyń dúken ishinen pyshaqpen shyqqanyn málimdedi.

Onyń sózinshe, tóbeles shamamen 3-4 mınýtqa sozylǵan.

«Meniń oıymsha, Sherzat dúkenniń aldynda pyshaqtaldy. Qashyp ketýime bolar edi. Alaıda myltyq oqtaýly bolǵan soń, artymnan atyp jibere me dep qoryqtym. Burylyp qashsam, Nurqanat meni atar edi. Sebebi ol «Atam, óltirem!» dep aıqaılap turdy. Sol sátte myltyqty alyp alýǵa tyrystym. Myltyqtyń dúmimen jelke tusynan urdym, biraq qatty tımedi», – dedi Іlııasov.

Sottalýshynyń aıtýynsha, oqıǵadan keıin olar dúkennen shyǵyp, «bıatlon» jaqqa barǵan. Sol jerde oqıǵany talqylap, keıin qaıtar jolda Talǵar aýdandyq polıtsııa qyzmetkerleri kólikti toqtatyp, kisi ólimi boıynsha jedel aqparat alǵandaryn habarlaǵan. Sodan keıin barlyǵyn polıtsııa bólimine jetkizgen.

Aıta keteıik, osy is boıynsha taǵy bir sottalýshy Dıdar Qalıahmet densaýlyǵyna baılanysty sot protsesine daıyn emes ekenin aıtyp, kelesi otyrysqa daıyn bolatynyn málimdegen bolatyn.

Sottalýshy ótirik aıǵaq bergenin moıyndady.

Sottalýshy Dýman Ysqaq ózine taǵylǵan aıypty moıyndamady.

Alǵashqy sot otyrysynda prokýror oqıǵanyń tolyq hronologııasyn baıandady.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzat aǵasynyń denesi tabyldy.