Sherzat Polat isi: eki sottalýshy ózin tolyq aqtaýdy surady
QONAEV. KAZINFORM — Sherzat Polattyń ólimine qatysty is boıynsha sottalǵan eki adam ózin tolyq aqtaýdy surap, kassatsııalyq shaǵym túsirdi. Bul týraly jábirlenýshi taraptyń advokaty Meıirman Shekeev aıtty.
Advokat áleýmettik jelidegi paraqshasynda jarııalaǵan beıneúndeýinde kassatsııalyq shaǵymdy sottalǵandar Azamat Toqtaýbaev pen Dıdar Qalıahmetov bergenin aıtty. Ekeýi de sot úkimimen kelispeıtinin aıtyp, ózin tolyq aqtaýdy talap etip otyr.
— Búgin ǵana, qazir desem de bolady, Sherzattyń isi boıynsha kassatsııalyq shaǵymdar kelip túsken eken, biraq biz muny qazir ǵana alýǵa múmkindigimiz týdy. Al sot otyrysy erteńge taǵaıyndalǵan eken, — dedi Meıirman Shekeev.
Eske salaıyq, 2025 jylǵy 5 maýsym kúni sot úkimimen 16 jastaǵy Sherzat Polattyń ólimine qatysty 9 adam 1,5 jyldan 23 jylǵa deıin sottaldy.
2025 jylǵy shilde aıynda sottalǵandardyń biri — Dýman Ysqaq jazasyn ótep, bostandyqqa shyqty.
Al sol jyly tamyz aıynda qalǵan aıyptalýshylar apellıatsııalyq shaǵym bergenimen, sot úkimdi ózgerissiz qaldyrdy.
