Sherzat Polat isi boıynsha kelesi sot otyrysy qashan jáne qalaı ótetini belgili boldy
TALDYQORǴAN. KAZINFORM – Kisi qolynan qaza tapqan jasóspirim Sherzat Polatqa qatysty kelesi sot otyrysy erteń, 18 sáýirde ótedi. Sondaı-aq aldaǵy sot otyrysy qalaı ótetini de belgili boldy.
Prokýrorlar kelesi sot otyrysyn kýágerlerden bastaý týraly ótinish jasady. Keıin jábirlenýshilerden sosyn aıyptalýshylardan jaýap alýdy surady.
Alaıda, aıyptalýshylardyń qorǵaýshylary aldymen jábirlenýshilerden, odan keıin kýágerlerden jaýap alýdy jáne is-materıaldaryn zerdeleýdi usyndy.
Sot taraptardyń pikirin tyńdap, mynandaı sheshim shyǵardy.
– Dáleldemelerdi zerteýdi birinshi, jábirlenýshilerden, sodan keıin kýágerlerden, keıin sottalýshylardan jaýap alýǵa qaýly etemin. Arasynda sol jábirlenýshiler men kýágerlerge qatysty qylmystyq is qujattaryn zertteý qajet bolǵan jaǵdaıda, zertteýge bolady, - dedi sýdıa Erjan Januzaqov.
Kelesi sot otyrysy, 18 sáýir tańǵy saǵat 10:00-ge belgilendi.
Eske salaıyq, prokýror sot otyrysynda olardyń árqaısysyna Qylmystyq kodekstiń qaı baptary boıynsha aıyp taǵylǵanyn oqydy.
Olar:
— Abzal Shynasyl Qylmystyq kodekstiń 293-baby 3-bóligi (buzaqylyq), 99-bap 2-bóligi 1,4,7, 9,14-tarmaqtary (adam óltirý), 24-bap 3-bóligi (qylmysqa daıyndalý jáne qylmysqa oqtalý);
— Ravıl Sákıev Qylmystyq kodekstiń 293-baby 3-bóligi (buzaqylyq), 24-bap 3-bóligi (qylmysqa daıyndalý jáne qylmysqa oqtalý), 99-bap 2-bóligi 7,9-tarmaqtary (adam óltirý);
— Shyńǵys Belǵojaev, Nurqııas Іlııasov, Darhan Áskentaı, Nurbol Toqtaýbaev, Dıdar Qalıahmet, Azamat Toqtaýbaev Qylmystyq kodekstiń 293-baby 3-bóligi (buzaqylyq).
— Kámeletke tolmaǵan Dıdar Ysqaq Qylmystyq kodekstiń 434-baby (qylmys týraly habarlamaý) boıynsha aıyp taǵylyp otyr.
Buǵan deıin sotta Sherzat óliminiń negizgi sebebi ataldy.
Sondaı-aq Nurqanat Ǵaıypbaevtyń janjal barysynda qandaı jaraqat alǵany aıtyldy.
Prokýror oqıǵanyń tolyq hronologııasyn baıandady.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.
Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.