Sherzat soty: Taǵy bir sottalýshy aıyptaý aktisimen kelispeıdi
TALDYQORǴAN. KAZINFORM — Sherzat Polattyń ólimine baılanysty Jetisý oblysynyń mamandandyrylǵan aýdanaralyq sotynda qaralyp jatqan qylmystyq is aıasynda sottalýshy Shyńǵys Belǵojaev jaýap berdi.
Onyń aıtýynsha, 2024 jylǵy 3 qazannan 4 qazanǵa qaraǵan túni ol jumystan shyǵyp, dosy Azamat Toqtaýbaevpen kezdesken.
Biraz ýaqyt sóılesip turǵan kezde Azamattyń uıaly telefonyna Nurqııas habarlasyp, «Eıforııa» meıramhanasyna shaqyrǵan. Sonymen qatar, bir jaqqa aparyp tastaýdy ótingen.
— Meıramhanaǵa kelgenimizde Nurqııas, Ravıl, Abzal jáne eki qyz boldy. Keıin Nurbol Toqtaýbaev habarlasyp, qaıda ekenimizdi surady. Ol Talǵar qalasynda júrgenin jetkizdi. Biraz ýaqyttan soń olar da kelip ketti, — dedi sottalýshy.
Onyń aıtýynsha, keıin Nurbol Toqtaýbaev ony «Qamajaı» dúkenine shaqyrǵan.
— Dúkenge barsaq, shamamen onshaqty adam júr eken. Ol jerde Nurbol, Dýman jáne Darhan Áskentaı boldy. Darhandy buryn Nurboldyń janynda birneshe ret kórgenmin, biraq aralasqan emespiz, — dedi ol.
Sotta Belǵojaev sol sátte Qarjaýbaıdyń dúkennen júgirip shyqqanyn, al ózi qaltasynan bákisin shyǵaryp, Qarjaýbaı árige bara qoımas degen oımen áreket etkenin aıtty.
Alaıda Qarjaýbaı bákiden seskene qoımaǵan. Osydan keıin Belǵojaev dúkenniń esigin teýip, ony ishke qaıta kirgizgen.
— Sol sátte tóbeles bastaldy. Keıin myltyq atyldy. Myltyq ustaǵan adam biz jaqqa qaratyp atqan kezde biz dúken janyndaǵy aǵashtyń artyna jasyrynyp qaldyq. Ekinshi ret atylǵannan keıin olar sheginip ketti. Sol kezde baryp men ony uryp, teptim. Negizinde myltyq atqan saqaldy adamdy uramyn dep barǵanmyn, biraq keıin beınejazbadan kórgenimdeı, men Sherzat Polatty uryp jiberippin, — dedi sottalýshy.
Shyńǵys Belǵojaev sotta pyshaq týraly da aıtyp ótti. Onyń sózine qaraǵanda, oqıǵa ornynda kórgen pyshaq — tergeý materıalyna tirkelgen pyshaq emes, ol úlken as úı pyshaǵyna uqsas bolǵan.
Sondaı-aq aıyptalýshy oqıǵa bolǵannan keıin óz kóligindegi myltyqty baıqap qalyp, ony «bıatlon» aımaǵy jaqtaǵy joldyń shetine aparyp laqtyrǵanyn jetkizdi.
— Menen surasa, taýyp beretin jerge tastadym, — dedi ol.
Memlekettik aıyptaýshy Shyńǵystyń qolynda pyshaq bolǵanyn aıtyp, suraq qoıdy. Ol óz kezeginde «bilmeımin» dep jaýap berdi.
Sonymen birge, «Sherzattyń anasy balasyn kimnen qorǵady?» degen suraqqa da «bilmeımin» dedi.
Ol aıyptaý aktisinde kórsetilgen «pyshaqtyń sabymen urdy» degen tujyrymmen kelispeıtinin aıtyp, tergeý kezinde qysym bolǵanyn jáne keıbir jaýaptarynyń sol qysymmen alynǵanyn málimdedi.
Eske sala keteıik, búgin Sherzat Polattyń ólimine qatysty sotta jaýap bergen taǵy bir sottalýshy Іlııasov myltyqpen urý sebebin túsindirgen edi.
Azamat Toqtaýbaev ótirik aıǵaq bergenin rastady.
Kámeletke tolmaǵan taǵy bir aıyptalýshy Dýman Ysqaq ózine taǵylǵan aıypty moıyndamady.
Aıta keteıik, Sherzat Polattyń ólimi boıynsha alǵashqy sot otyrysynda prokýror oqıǵanyń tolyq hronologııasyn baıandady.
Byltyr 4 qazan kúni tóbelesten 16 jastaǵy jasópirim qaza bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat aǵasynyń denesi tabyldy.