Sherzat otbasynyń úıindegi órtke qatysty tergeý qaıta jandandy
QONAEV. KAZINFORM – Almaty oblysynyń prokýratýrasy 2024 jyldyń kúzinde bolǵan oqıǵaǵa baılanysty tergeý jumystarynyń qaı satyda ekenin túsindirdi.
Byltyr Bas prokýrordyń orynbasary Ǵalymjan Qoıgeldıev istiń mán-jaıyn jan-jaqty anyqtaý úshin Reseı Federatsııasynan spýtnık sýretteri kelýi tıis ekenin, tergeýdiń soǵan baılanysty kidirgenin túsindirgen bolatyn. Keıin 2025 jyldyń tamyz aıynda atalǵan derek boıynsha sotqa deıingi tergep-tekserý jumystarynyń toqtatylǵany belgili boldy.
Aıaǵyna jetkizilmegen iske baılanysty agenttik taǵy da saýal joldap, Almaty oblysynyń prokýratýrasyna júgindi.
— Q.Nurymovtyń úıinde bolǵan órt deregi boıynsha tirkelgen qylmystyq is aıasynda qazirgi ýaqytta tergeý organy qajetti tergeý amaldaryn júrgizip jatyr. Olardyń nátıjesi boıynsha tıisti protsestik sheshim qabyldanady. Atalǵan qylmystyq iske qatysty ózge de málimetter Qazaqstan Respýblıkasy Qylmystyq-protsestik kodeksiniń 201-babyna sáıkes tergeý múddesi úshin jarııa etýge jatpaıdy, — delingen oblys prokýrory Berik Adamovtyń jaýabynda.
Sonymen qatar qadaǵalaý organy spýtnıktik derekterdiń alynǵan-alynbaǵanyn jáne bul is boıynsha kúdiktilerdiń anyqtalýyn naqtylaǵan joq.
Eske salaıyq, 2024 jyly 4 qazanda tóbelesten 16 jastaǵy Sherzat Polat qaıtys boldy. Іs qoǵamda úlken rezonans týdyrdy.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady
2025 jyly 5 maýsymda sot úkimimen jasópirimniń ólimine qatysty 9 adam 23 jyldan 1,5 jylǵa deıin sottaldy. Al tamyz aıynda apellıatsııalyq sot úkimdi ózgerissiz qaldyrdy.
Byltyr Sherzat Polattyń otbasy demeýshilerdiń kómegimen jańa baspanaǵa kóshedi.