Sherzat Bolattyń ólimine qatysty tergeýde eshqandaı zańbuzýshylyq anyqtalǵan joq - prokýror

QONAEV. KAZINFORM – Sherzat Bolattyń ólimine qatysty tergeý qarqyndy júrip jatyr. Bul týraly baspasóz máslıhatynda Almaty oblysynyń prokýrory Berik Adamov málim etti. 

Prokýrordyń aıtýynsha, atalǵan qylmystyq is boıynsha júrgizilip jatqan tergeý satysyna eshqandaı zańbuzýshylyq anyqtalǵan joq. 

«Bizdiń tarapymyzdan tergeý is sharalarynyń zańdylyǵy men tolyqtyǵy qamtamasyz etildi. Sot protsesiniń ashyqtyǵy jóninde másele boıynsha prkýratýra sotqa ótinish hat engizýdi qarastyryp jatyr», - dedi ol.

Eske salaıyq,4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.

Ashýly talǵarlyqtar jasóspirim ólimine baılanysty narazylyqqa shyqty.

Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.

Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.

Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.

Almaty oblystyq polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi.

12 qazan kúni túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

Sondaı-aq, Bas prokýratýra qylmysty ashý úshin vedomstvoaralyq jedel-tergeý toby qurylǵanyn málimdedi.

Іshki ister mınıstriniń birinshi orynbasary Baýyrjan Alenov marqum Sherzat Bolattyń úıin órteý oqıǵasyn tergeý tobymen Talǵarǵa bardy.

Keıin Іshki ister mınıstriniń birinshi orynbasary Baýyrjan Alenov órt qylmysy boıynsha aıǵaqtar alynyp, tıisti saraptamalar júrgizilip jatqanyn habarlady.

Qoǵamdyq tártipti qadaǵalaý úshin Ulttyq ulan áskeri jumyldyryldy.