Sherzat Bolattyń ólimine qatysty kúdiktilerdiń arasynda buryn sotty bolǵandar bar
QONAEV. KAZINFORM – Qamaýǵa alynǵan kúdiktilerdiń arasynda buǵan deıin qylmystyq jaýapqa tartylǵan adamdar bar.Bul týraly ІІM tergeý departamenti bastyǵynyń orynbasary Samat Aısov baspasóz máslıhaty barysynda aıtty.
«Qylmystyq is boıynsha kúdiktilerdiń ishinde qylmystyq ispen kezinde (tergeýden ótken bolýy múmkin – red. esk.) ótken adamdar da, sottalǵan adamdar da bar. Qylmystardyń túrleri buzaqylyq jáne taǵy da basqa», - dedi ol.
Óz kezeginde Іshki ister mınıstriniń birinshi orynbasary Baýyrjan Álenov probatsııalyq baqylaýda bolǵandar týraly aıtty.
«Probatsııalyq baqylaýdaǵy, túngi merzimde júrgen tulǵalar boıynsha qyzmettik tekseris ótkizip, bizdiń qyzmetkerler ne sebepti buǵan jol bergenderin anyqtaımyz», - dedi Baýyrjan Álenov.
Eske salaıyq,4 qazanda Talǵar qalasyndaǵy tóbelesten bir adam qaıtys bolǵanyn jazǵanbyz.
Ashýly talǵarlyqtar jasóspirim ólimine baılanysty narazylyqqa shyqty.
Almaty oblysynyń Prokýratýrasy kisi óltirý týraly bul is erekshe baqylaýǵa alynǵanyn resmı túrde habarlady.
Іshki ister mınıstri Erjan Sádenov Almaty oblysy Talǵar aýdanyndaǵy jasóspirimniń ólimine qatysty isti jeke baqylaýyna aldy.
Sondaı-aq, quqyq qorǵaýshy Aıtbek Amangeldi qaza tapqan jasóspirimniń otbasyna advokattar taýyp berdi.
Almaty oblystyq polıtsııa departamenti bastyǵynyń mindetin atqarýshy Serik Shalqarov beınebaqylaý kameralarynan alynǵan jazbalar zerttelip jatqanyn jetkizdi.
12 qazan kúni túnde qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
Sondaı-aq, Bas prokýratýra qylmysty ashý úshin vedomstvoaralyq jedel-tergeý toby qurylǵanyn málimdedi.
Іshki ister mınıstriniń birinshi orynbasary Baýyrjan Alenov marqum Sherzat Bolattyń úıin órteý oqıǵasyn tergeý tobymen Talǵarǵa bardy.
Keıin Іshki ister mınıstriniń birinshi orynbasary Baýyrjan Alenov órt qylmysy boıynsha aıǵaqtar alynyp, tıisti saraptamalar júrgizilip jatqanyn habarlady.
Qoǵamdyq tártipti qadaǵalaý úshin Ulttyq ulan áskeri jumyldyryldy.
