Sherhan Murtazany eske alýǵa arnalǵan bılıard týrnıriniń jeńimpazdary belgili boldy
ALMATY. QazAqparat – Almatyda halyq jazýshysy Sherhan Murtazany eske alýǵa arnalǵan bılıard týrnıri ótti. Oǵan buqaralyq aqparat quraldarynyń ókilderi qatysty, dep habarlaıdy QazAqparat.
Týrnırdi «Egemen Qazaqstan» gazeti men Almaty ákimdigi birlesip uıymdastyrǵan. Jarysqa elimizdiń birqatar óńirinen jýrnalıster qatysyp, baq synady.
Sharanyń ashylý saltanatynda shahar basshysy Baqytjan Saǵyntaev, «Egemen Qazaqstan» respýblıkalyq gazeti» AQ basqarma tóraǵasy Darhan Qydyráli, tanymal jazýshy Sarbas Aqtaev pen Qazaqstan Jazýshylar odaǵynyń tóraǵasy Ulyqbek Esdáýlet quttyqtaý sóz sóıledi.
Jarys eki túrli jas sanaty boıynsha uıymdastyryldy. 55 jasqa deıingiler arasynda «Almaty» telearnasy jańalyqtar bóliminiń shyǵarýshy redaktory Úmbetáli Meımesh jeńimpaz atandy. Ekinshi oryn «Jambyl» telearnasynyń qyzmetkeri Serik Tájibaevqa buıyrsa, Jambyl oblysy Jýaly aýdany «Jańa ómir» gazetiniń bas redaktory Berik Jumabaıuly úshinshi oryndy qanaǵat tutty.
Ardagerler arasynda bas júldeni Nurtileý Imanǵalıuly jeńip aldy. Oǵan fınalda jol bergen professor Aıazbı Beısenqul ekinshi orynǵa jaıǵassa, úshinshi oryndy Jazýshylar odaǵynyń basqarma hatshysy Ǵalym Qalıbekuly enshiledi.
Týrnır jeńimpazdary kýboktan bólek aqshalaı syılyqqa ıe boldy. Birinshi orynǵa – 150 myń teńge, ekinshi orynǵa – 100 myń teńge, al úshinshi orynǵa 50 myń teńge syı-sııapat tigilgen bolatyn.
Foto: Egemen Qazaqstan
