Sherhan Murtazanyń 6 myń bettik murasy Ulttyq arhıv qoryna tabystaldy
ASTANA. KAZINFORM – Respýblıka kúni qarsańynda qazaq ádebıetiniń kórnekti ókili, jazýshy jáne qoǵam qaıratkeri Sherhan Murtazanyń biregeı shyǵarmashylyq muralary Ulttyq arhıvke resmı túrde tabys etildi, dep habarlaıdy Kazinform tilshisi.
Іs-sharaǵa belgili qoǵam jáne mádenıet qaıratkerleri, jazýshynyń týystary men ádebıettanýshylar qatysty.
Qundy qor retinde tapsyrylǵan materıaldardyń qatarynda jazýshynyń áıgili «Qyzyl jebe» romanynyń túpnusqa qoljazbalary, Turar Rysqulov týraly zertteý jazbalary, sondaı-aq keńestik bılikke qarsy shyqqan qazaq zııalylarynyń kúresin sýretteıtin «Beseýdiń haty» atty eki bólimdi dramasynyń jáne basqa da shyǵarmalarynyń qoljazbalary bar.
– Bul qoljazbalar Sheraǵańnyń stýdent kezinen bastaý alady. Іshinde óziniń kórkem shyǵarmalary men estelikteri bar. Meniń ózime erekshe áser etkeni – stýdent kezinde jazǵan, syzǵan qoıyn dápteri. Bul shyǵarmashylyq zerthanasynan habar beretin qundy qoljazbalar. Sondaı-aq baspaǵa daıyndaǵan kezinde túzetip, keı jerlerine túsinikteme bergen jazbalary bar. Bul ádebıettanýshy ǵalymdar úshin asa mańyzdy dep oılaımyn. Sonymen birge maqalalary jáne kóptegen kóne, qundy fotosýretter saqtalǵan, – deıdi «Qazaq gazetteri» JShS bas dırektory Dıhan Qamzabekuly.
Arhıv qoryna jazýshynyń ómiri men shyǵarmashylyǵyna qatysty buryn esh jerde jarııalanbaǵan sırek fotosýretteri, jeke hattary, jazba dápterleri jáne tarıhı-mádenı mańyzy zor ózge de qujattar ótkizildi.
QR Ulttyq arhıviniń dırektory Saǵıla Nurlanova bul muralardy kózdiń qarashyǵyndaı saqtap, kelesi urpaqqa jetkizýdiń mańyzdylyǵyn atap ótti.
– Búgin tarıhı ári taǵylymdy oqıǵanyń kýási bolyp otyrmyz. Óıtkeni bizdiń Ulttyq arhıvtiń qory qazaq ádebıetiniń alyby Sherhan Murtazanyń jeke qorymen tolyǵyp jatyr. Arhıv tek qujattardy saqtaıtyn oryn emes. Bul – ulttyń jadyn, eldiń rýhyn, tulǵalarymyzdyń taǵdyryn saqtaıtyn kıeli meken. QR Ulttyq arhıvi elimiz táýelsizdik alǵan jyldardan bastap el taǵdyryna qatysty mańyzdy qujattardy saqtap keledi. Bizdiń maqsatymyz – osyndaı qundy muralardy saqtaý ǵana emes, ony bolashaq urpaqqa amanattaý. Memleket tarıhy – eldiń el bolyp qalyptasýyna úlken úles qosqan tulǵalarymyzdyń eńbeginen quralady. Sondyqtan osy tulǵalarymyzdyń eńbegi men murasyn kózdiń qarashyǵyndaı saqtaý – bizdiń boryshymyz. Bul muralar Ulttyq arhıvtiń sóresinde ǵana emes, árbir qazaqtyń júreginde saqtalsa eken, – dedi Saǵıla Nurlanova.
QR Ulttyq arhıviniń jarııalaý-baspa bóliminiń basshysy Ábý-Asqar Mekeshulynyń aıtýynsha, qazirgi ýaqytta bul qujattardy zertteý jáne qalpyna keltirý jumystary júrgizilip jatyr.
– «Egemen Qazaqstan» bizge Sherhan Murtazanyń 6000 paraqtyq murasyn tapsyrdy. Qujattardy saqtaýdyń óz zańdylyǵy bar: temperatýra rejımi durys saqtalmasa, qaǵaz búlinedi. Bul muralardyń ishinde búlingenderi de bar. Bizdiń mamandar barlyǵyn ortaǵa beıimdeý, tazartý jáne búlingenderin qalpyna keltirý, ıaǵnı «emdeý» jumystaryn júrgizip jatyr, – dedi ol.
Eske sala keteıik, buǵan deıin Astanada jańa balalar kitaphanasy ashylǵanyn habarlaǵan edik.