Sherhan men Shıva: Qaraǵandy haıýanattar baǵynda jańa týǵan jolbarystarǵa at qoıyldy

QARAǴANDY. QazAqparat – Qaraǵandy haıýanattar baǵynda qala turǵyndarynyń kómegimen jańa týǵan jolbarystarǵa esim tańdaldy. Jolbarys kúshikterin ataýǵa barlyǵy 400 adam qatysty, dep habarlaıdy QazAqparat oblys ákimdiginiń baspasóz qyzmetine silteme jasap.

Qaraǵandylyqtar ártúrli ataýlar usynǵan: Han jáne Táńiri, Kara men Gandı, Barhan men Sahara, Lıýk pen Leıa jáne taǵy basqalar.

Kóp talqylaýdan keıin jolbarystardyń atalyǵyna Sherhan, al urǵashysyna Shıva degen esim qoıyldy.

Esterińizge sala keteıik, maýsym aıynyń basynda Qaraǵandy haıýanattar baǵynda 15 jylda alǵash ret jas jolbarystardyń jubynda urpaq paıda boldy. Batyr men Mıa ata-ana atandy. Jolbarystarǵa at qoıý ýaqyty kelgende haıýanattar baǵy dástúr boıynsha kelýshiler arasynda baıqaý jarııalady.