Sherhan Aımahannyń dıagnozy onyń óz áreketin baqylaýyna kedergi bolmaǵan — sarapshy
ShYMKENT. KAZINFORM — Shymkent qalasynyń qylmystyq ister jónindegi mamandandyrylǵan aýdanaralyq sotynda Nuraı Serikbaıdyń ólimine qatysty qoǵamda keń rezonans týdyrǵan is boıynsha sot talqylaýy jalǵasyp jatyr. Altynshy sot otyrysynda Almatydaǵy Sot saraptamalary ınstıtýtynyń sot-psıhıatrııalyq sarapshysy Temirlan Seıtek onlaın rejımde jaýap berdi.
Jaýap alý barysynda maman sottalýshy Sherhan Aımahanǵa qatysty júrgizilgen keshendi psıhıatrııalyq saraptamanyń nátıjelerin túsindirdi. Sarapshylardyń qorytyndysyna sáıkes, onyń medıtsınalyq kartasynda kórsetilgen dıagnozdarǵa qaramastan, sottalýshy qylmys jasaǵan sátte bolyp jatqan jaǵdaıdy tolyq túsinip, óz áreketterine esep bere alǵan.
— Sottalýshyda bar obsessıvti-kompýlsıvti buzylys onyń óz áreketteriniń sıpatyn túsiný jáne olardy baqylaý qabiletinen aıyrǵan joq. Sozylmaly psıhıkalyq aýrýlarǵa shızofrenııa, shızotıptik jáne organıkalyq buzylystar jatady. Olar adamnyń óz áreketteriniń mánin durys túsiný jáne sol úshin jaýap berý qabiletinen aıyrýy múmkin. Aımahannyń medıtsınalyq qujattarynda «aralas obsessıvti oılar men áreketter», ıaǵnı F42.2 obsessıvti-kompýlsıvti buzylysy dıagnozy kórsetilgen. Buǵan deıin ol Rýdnyı qalasynda em qabyldaǵan. Alaıda mundaı psıhıkalyq aýytqý adamnyń óz áreketterine esep berý qabiletinen aıyrmaıdy. Ol óz áreketterin túsinip, baqylaýǵa qabiletti bolǵan, — dedi Temirlan Seıtek.
Sarapshy sondaı-aq qazirgi ýaqytta Aımahanǵa qosymsha májbúrli em qajet emes ekenin jáne psıhıkalyq jaǵdaıyna baılanysty tergeý jáne sot protsesterine qatysa alatynyn aıtty.
Qorǵaý tarapy sarapshylar komıssııasy qandaı materıaldardy zerttegenin surady. Temirlan Seıtek komıssııaǵa qylmystyq istiń eki tomy jáne jaýap alýdyń biriniń beınejazbasy jazylǵan dısk usynylǵanyn túsindirdi. Al buǵan deıingi jaýaptar jazbasha hattamalarda bolǵan.
— Biz tergeý organy usynǵan materıaldarmen jumys isteımiz. Sonymen qatar saraptamanyń nysany — adamnyń ózi. Biz onymen tikeleı áńgimelesip, zertteý nátıjeleri negizinde qorytyndy beremiz, — dep túsindirdi sarapshy.
Maǵan qysym kórsetildi: Aımahan saraptama qorytyndysymen kelispedi
Odan keıin sarapshyǵa suraqtardy sottalýshynyń ózi qoıdy.
Sherhan Aımahan sarapshylarǵa usynylǵan 5 mamyrdaǵy beınejazba Almatydan Shymkentke qaıtarylǵannan keıin oǵan qysym kórsetý arqyly túsirilgenin málimdedi. Sondaı-aq ol Aqtastaǵy respýblıkalyq psıhıatrııalyq aýrýhanada bolǵan kezinde medıtsına qyzmetkerleri tarapynan qysym kórsetilip, kemsitýge ushyraǵanyn aıtty.
— Sanıtarlar: «Qaıtyp bar, áıtpese bul jerden seniń máıitińdi ǵana alyp shyǵamyz» dep aıtty. Men tolyqqandy saraptama júrgizilmedi dep esepteımin. Sizder suraq qoıyp otyrǵan kezde basqa qyzmetkerler jaı ǵana shaı iship otyrdy. Men bul qorytyndymen kelispeımin, — dedi Sherhan Aımahan.
Bul shaǵymdarǵa sarapshy qorytyndylardyń obektıvti tekserý nátıjesinde jasalǵanyn aıtty. Al aýrýhanada oǵan qysym kórsetilgeni týraly málimdemeler tergeý organdarynyń quzyretine jatatynyn atap ótti.
— Sizge belgilengen ádisteme boıynsha tolyqqandy tekserý júrgizildi. Biz sizdiń ótken ómirińiz, oqıǵanyń mán-jaıy, qolyńyzdaǵy jaraqattar týraly suradyq. Sizben psıhıatr, psıholog jáne komıssııanyń basqa da músheleri áńgimelesti. Qorytyndy daıyndaý úshin qajetti suraqtardyń barlyǵy qoıyldy, — dep túsindirdi sarapshy.
Psıhıatrdy jaýap alý aıaqtalǵannan keıin sot saraptamanyń psıhologııalyq bóligine kóship, sot sarapshysy-psıholog Kúlásh Qojamjarova onlaın rejımde jaýap berdi.
Kazinform tilshileri sot protsesiniń barysyn baqylaýdy jalǵastyrady.
Eske salaıyq, 11 qańtarda Shymkentte 21 jastaǵy Nuraı Serikbaı qaza tapqan bolatyn. Tergeý nusqasyna sáıkes, Sherhan Aımahan qyzǵa pyshaqpen 35 ret jaraqat keltirgen.
Buǵan deıin sot shabýyl jasalǵan sáttiń beınejazbalaryn jáne DNQ saraptamalarynyń nátıjelerin zerttegen. Sot-medıtsınalyq sarapshy anatomııalyq maneken arqyly 35 jaraqattyń ornalasqan jerin kórsetken. Qaıtys bolǵan qyzdyń otbasy moraldyq zııan úshin 10 mlrd teńge kóleminde azamattyq talap aryz berip, talap qanaǵattandyrylǵan jaǵdaıda bul qarajatty qaıyrymdylyqqa jumsaýdy josparlap otyrǵanyn málimdedi.
