Sheremetanyń bapkeri Gennadıı Golovkınniń daıyndyǵy týraly aıtty

NUR-SULTAN. QazAqparat – Polshalyq boksshy Kamıl Sheremetanyń (21-0, 5 KO) tálimgeri Fedor Lıapın sportshynyń kelesi qarsylasy - qazaqstandyq Gennadıı Golovkınniń (40-1-1, 35 KO) jattyǵý barysy týraly aıtty, dep habarlaıdy QazAqparat Sports.kz saıtyna silteme jasap.

«Biz qańtar nemese aqpan aılarynda jekpe-jekke daıyndalyp júrgende Golovkın tipti jattyqqan da joq. Biz muny bilemiz. Biraq biz Golovkınniń onsyz da úlken sheber ekenin jáne ol basqasha jumys jasaıtynyn jaqsy túsinemiz. Bizge ony qabyldaýǵa jáne óz múmkindigimizdi kútýge týra keldi», — dedi Lıapın.

Áý basta Golovkın-Sheremeta jekpe-jegi aqpan aıyna josparlanǵan bolatyn, biraq birneshe ret keıinge qaldyryldy. Bir márte Gennadııdiń jaraqatyna baılanysty, sodan keıin AQSh-ta jáne álemniń kóptegen elderinde koronavırýs pandemııasynyń bastalýyna baılanysty keıinge shegerilgen bolatyn.

Endi jekpe-jek qazan aıynda ótedi dep josparlanyp otyr, al naqty ótetin kúni jaqyn arada jarııalanady.