Sheremetevodaǵy 41 adam qaza tapqan áýe apatynyń sebebi anyqtaldy
MÁSKEÝ. TASS-QazAqparat – Tergeý Sheremetevo áýejaıyndaǵy «Aeroflot» áýe kompanııasynya tıesili Sukhoi Superjet ushaǵynyń apatqa ushyraýyna ekıpaj komandıri Denıs Evdokımov kináli degen uıǵarym jasady, dep habarlaıdy QazAqparat TASS agenttigine silteme jasap.
RF Tergeý komıteti tóraǵasynyń orynbasary Igor Krasnov «Kommersant» gazetine bergen suhbatynda jerdegi qyzmetke ári qaraı tergeý júrgizilmeıtinin habarlady.
«Bizde bul qaıǵyly jaǵdaıdyń naqty sebebi kórsetilgen sarapshylar qorytyndysy bar. Biz áýe kompanııasy men ushqyshtyń dálelin tekserdik. Bul apatqa ushaq kináli emes, sebebi tek SSJ-men ǵana emes, Boeing jáne Airbus-pen jáne basqa da ushaqtarmen bulaı qonýǵa bolmaıdy», - dedi ol.
Krasnov Evdokımovke áýe kóligin paıdalaný erejelerin buzdy degen aıyp taǵylǵanyn eskertti. Qazir ol advokatymen birge is materıaldarymen tanysyp jatyr. Krasnovtyń aıtýynsha, Evdokımovtyń túrli úlgidegi ushaqtardy basqarýda aıtarlyqtaı tájirıbesi bar jáne arnaıy daıyndyqtan ótken.
«Soǵan qaramastan, bizdiń qyzmetkerlerimiz anyqtaǵandaı, ol áýe kemesiniń paıdalaný shekteýinen asyp ketetindeı aýyr júk tıegen», - dedi TK tóraǵasynyń orynbasary.
Ol jyldamdyqtyń joǵary bolýynan jáne vertıkaldy salmaqtyń normadan asyp ketýi saldarynan jolaqqa tym qatty qonǵan. SSJ ushý-qoný jolaǵynan shassıdiń negizgi tiregi synǵanǵa deıin úsh ret sekirgen. Sonyń saldarynan ushaqtyń janarmaıy tógilip, tutanǵan.
Evdokımovtiń advokaty Natalıa Mıtýsova onyń óz kinásin moıyndamaıtynyn málim etti. Oǵan eshqaıda ketpeý týraly tilhat berilgen.
Eske sala keteıik, ótken jyldyń 5 mamyrynda Sheremetevo áýejaıyna qonǵan ushaq órtenip ketken bolatyn. Bortta bolǵan 78 adamnyń 41-i apatta qaza tapty.
Foto: © Sergeı Fadeıchev/TASS