Sheremetevoda ushaq apatyna alyp kelgen sebepter ataldy
MÁSKEÝ. QazAqparat - Sheremetevo áýejaıynda Sukhoi Superjet 100 ushaǵy birneshe sebepke baılanysty apatqa ushyraýy múmkin. Olardyń arasynda ushqyshtar men dıspetcherlerdiń biliktiliginiń tómendigi, aýa raıynyń qolaısyzdyǵy jáne tehnıkalyq aqaýlar bar. Bul týraly jýrnalısterge RF Tergeý komıtetiniń resmı ókili Svetlana Petrenko habarlady.
Onyń aıtýynsha, Sheremetevoda oqıǵa bolǵan jerde ótken shuǵyl jınalys barysynda Aleksandr Bastrykın apatqa alyp kelgen barlyq sebepter men jaǵdaılardy, barlyq tulǵalardy anyqtaýdy tapsyrǵan.
Buǵan deıin TASS-qa quqyqqorǵaý organdaryndaǵy derekkóz habarlaǵandaı, tótenshe jaǵdaı sebepteriniń negizgi nusqasy - ushaqqa naızaǵaıdyń túsýi. «Negizgi nusqa - ushaqqa naızaǵaı túsip, sodan keıin ushaqtyń avtomatıkasy isten shyqqan. Qonǵan kezde, aldyn ala derek boıynsha, ushyp-qoný jolaǵyna eki ret soǵylyp, keıin jana bastaǵan», - dedi derekkóz. Onyń aıtýynsha, naızaǵaıdyń túskenin ekıpaj ben jolaýshylar rastaǵan.
Reseıdiń Sheremetevo áýejaıynda bolǵan ushaq apaty jóninde buǵan deıin habarlaǵan bolatynbyz. Órtengen Sukhoi Superjet 100 ushaǵynyń bortynda bolǵan 78 adamnyń 37-si ǵana aman qaldy. QR SІM zardap shekken jáne qurban bolǵandar arasynda qazaqstandyqtardyń bar-joǵyn tekserip jatyr.
QR Indýstrııa jáne ınfraqurylymdyq damý mınıstri Roman Sklıardyń aıtýynsha, Qazaqstanda Reseıde óndirilgen «SSJ-100» markaly bir ǵana bıznes ushaq paıdalanylady.
«Bul ushaq jekemenshik kompanııaǵa tirkelgen. Al turaqty baǵdarlarda bizde osy tıptegi áýe kemesi paıdalanylyp júrgen joq», - dedi mınıstr.
Qazaqstan Prezıdenti Qasym-Jomart Toqaev pen Premer-Mınıstr Asqar Mamın apatqa baılanysty kóńil aıtty.
