Sheremetevo áýejaıyndaǵy jaǵdaıǵa baılanysty «Eır Astana» áýe kompanııasynyń reısteri keıinge shegerildi
ALMATY. 27 jeltoqsan. QazAqparat /Erbol Azanbek/ - Aýa-raıynyń qolaısyzdyǵy men Sheremetevo áýejaıynda muz eritý suıyqtyǵynyń bolmaýyna baılanysty Almaty-Máskeý-Almaty baǵytyndaǵy ushaqtardyń ushý-qoný kestesi ózgertildi. Bul týraly «Eır Astana» AQ áýekompanııasynyń baspasóz qyzmeti habarlady.
Máskeý áýejaıynda aýa-raıynyń sýytýyna baılanysty barlyq áýe kemelerin muz eritý suıyqtyǵymen óńdeýge suıyqtyq jetispeýshiligi oryn alyp otyr. Osyǵan baılanysty áýejaı basshylyǵy 60 reısti keri shegergen. Bulardyń qatarynda «Eır Astana» reısteri de bar. Keshe áýe kompanııasynyń Almaty-Máskeý baǵytyndaǵy KS875, Máskeý-Almaty baǵytyndaǵy KC -876 reısi toqtatylǵan. Sondaı-aq keshe, búgin bul baǵyttaǵy birqatar reıster shegerilgen.
«Eır Astana» bul kúnderi ushýy tıis jolaýshylarǵa óziniń týrıstik agenttikterimen nemese brondaý jáne aqparat ortalyǵyna habarlasyp bıletti keri qaıtaryp nemese ushý kúnin ózgertýge keńes beredi.
Sonymen qatar jolaýshylar qoldaǵy bıletteri arqyly 9 qańtarǵa deıin bos oryn bolǵan jaǵdaıda Máskeý baǵytyna usha alady nemese Reseıdiń basqa qalalaryna baǵytyn ózgerte alady. Ushý baǵytyn ózgertý tegin, sondaı-aq bılet quny tolyq qaıtarylady.
