Shengen vızasy qazaqstandyqtar úshin arzandaýy múmkin — SІM
ASTANA. KAZINFORM — Qazaqstan azamattary úshin Shengen vızasyn alý quny tómendeýi múmkin. Bul baǵytta Qazaqstan men Eýropalyq odaq arasynda kelissózder júrgizilip jatyr. Bul týraly Májilis kýlýarynda Syrtqy ister mınıstriniń orynbasary Álibek Baqaev málim etti.
Mınıstrliktiń habarlaýynsha, taraptar eki negizgi qujat boıynsha kelissóz júrgizip jatyr. Olar — vızalyq rejımdi jeńildetý týraly kelisim jáne readmıssııa týraly kelisim ıaǵnı, elde zańsyz júrgen tulǵalardy olardyń azamattyǵy bar memleketke qaıtarý tártibi.
Syrtqy ister mınıstriniń orynbasary Álibek Baqaev atap ótkendeı, bul kelissózder vızasyz rejım engizýdi kózdemeıdi. Degenmen, kelisimderge qol jetkizilgen jaǵdaıda Shengen vızasyn rásimdeý tártibi jeńildeı túsedi.
— Qujattarǵa qoıylatyn talaptar naqty reglamentteledi. Bul óte mańyzdy. Kóp mártelik vıza berý máselesi de talqylanyp jatyr. Baǵaǵa qatysty suraqtar da bar. Biz vızanyń arzandaýyn kózdep otyrmyz, — dedi ol.
Vıtse-mınıstrdiń aıtýynsha, kelissózder 2026 jyldyń ekinshi jartysynda aıaqtalýy múmkin. Odan keıin qujattardy ratıfıkatsııalaý rásimi bastalady.
— Bizdiń tarapta ratıfıkatsııa Parlament arqyly bir kezeńde ótedi. Al Eýropalyq odaqta barlyq múshe memleket pen Eýroparlament óz qorytyndysyn berýi tıis, — dedi Álibek Baqaev.
Buǵan deıin Eýropaǵa vıza rejımin jeńildetý boıynsha kelissózdiń ekinshi raýndy ótkenin jazǵanbyz.
