Sheneýnikter fermerlerdiń mıllıardtaǵan ınvestıtsııa quıǵan jerlerin sotpen alyp qoıǵan
PAVLODAR. KAZINFORM - Pavlodar oblysynyń jer resýrstaryn basqarýǵa jaýapty memlekettik organdary sońǵy eki jylda 33 sharýany jerinen aıyrǵan. Prokýratýra olardyń arasynda adal eńbek etip, óz qarajatyna jer telimine ınfraqurylym tartqan sýbektiler bar ekenin aıtady
Oblys prokýrorynyń aǵa kómekshisi Jandos Saǵatbekovtyń sózinshe, jer resýrstaryn damytý departamenti sotqa 44 talap aryz bergen. Onyń 24-i qanaǵattandyrylyp, saldarynan 33 fermer jersiz qalǵan.
- Bul jerdi paıdalanbaı, memleketke óz erkimen ótkizgenderdi esepke almaǵandaǵy kórsetkish. Aýyl sharýashylyǵy maqsatyndaǵy jerlerge quqyq belgileıtin qujattardy jaramsyz dep taný týraly sheshimder shyǵyp qoıdy. 33 sharýanyń arasynda jerge ınfraqurylym salyp qoıǵandary bar. Mysal úshin qazir sotta «Zaman» sharýa qojalyǵyna qatysty talap aryz jatyr. Bul ınvestor sýarmaly egistiktiń 200 gektaryna sý jınaıtyn jáne sý beretin ınfraqurylym salǵan. Kásipkerdiń bul jobasy nazarǵa alynbaǵan. Osylaısha óńirdiń ekonomıkasyna orasan zor shyǵyn kelip otyr. Al kásipkerler mıllıardtaǵan teńge shyǵynǵa ushyrady. Mundaı talap aryzdardyń maqsaty belgisiz, nátıjesi kóp jaǵdaıda «nólge» teń,-deıdi J.Saǵatbekov
Al Pavlodar oblysy ákiminiń orynbasary Áıgerim Qabyltaeva jergilikti jer qatynastary basqarmasy Memleket basshysynyń jer telimderin tıimdi paıdalaný jónindegi tapsyrmasy aıasynda jumys júrgizip jatqanyn atap ótti.
- Tıisti quqyqtyq bazanyń bolmaýy boıynsha qıyndyqtar bar. Aldaǵy ýaqytta Aýyl sharýashylyǵy mınıstrliginiń buıryǵyna sáıkes ózgerister engiziledi dep kútilýde. Men jer qatynastary basqarmasyna jáne qalalar men aýdandar ákimdikteriniń tıisti jer qatynastary bólimderine adaldyǵy arnaıy jer komıssııalarynda qaralatyn jer paıdalanýshylardyń tizimin jasaý jóninde tapsyrma berdim. Investıtsııa tartý máselesi óńir úshin basymdyqqa ıe, - deıdi oblys ákiminiń orynbasary.
Buǵan deıin prokýrorlar Pavlodar oblysynyń agroónerkásip kesheni boıynsha memleketke 500 mln teńge shyǵyn kelgenin anyqtaǵan.