«Sheneýniktiń jumysyn kameramen qadaǵalaý kerek pe?» - baspasózge sholý
***
«Egemen Qazaqstan» basylymynyń jazýynsha, Táýelsizdiktiń bederinde qalalyq jerlerge jumys izdep qonystanyp jatqan otbasylardyń kóbeıýi, oǵan keıingi jyldary turmysy túzelgen qala turǵyndarynyń qala syrtynda shańyraqtaryn keńeıtip, qurylysty qyzdyrýy ózimen birge birqatar ózekti máselelerdi týyndatty. Endigi tirshilikte týyndaǵan túıtkildiń biri - ýrbanızatsııa men qalalyq aglomeratsııa máselesi Elbasynyń bıylǵy Joldaýynda tuńǵysh ret qozǵaldy. «Árıne, bul zańdy qubylys. Qoǵamnyń damýy, órkenıettiń kóshine ilesken halqymyz jaqsy ómirdi qaladan izdeıtini aıan. Osy turǵydan alǵanda, áý bastan-aq arman bolǵan Almaty ýrbanızatsııa úderisiniń tap ortasynda tur. Áleýmettik damý barysyn zertteýshilerdiń boljamy boıynsha, 20-30 jyldan keıin Qazaqstandaǵy aýyl men qala turǵyndarynyń arasalmaǵy 65-35 paıyzdy quraıtyn kórinedi. Qazir bul kórsetkish Reseıde -72, Belarýs, Ýkraına, Armenııada - 70, Amerıkada 90 paıyzǵa teń eken»,-dep jazylǵan gazette «Aglomeratsııa» degen taqyryppen jaryq kórgen maqalady.
Osy basylymda «Jastar jumyssyzdyǵynyń sebebi nede?» atty maqala berilgen. Atyraýda Prezıdent janyndaǵy jastar saıasaty jónindegi keńestiń HVII kóshpeli otyrysy ótti. Oǵan elimizdegi barlyq oblystardyń jastar saıasaty máseleleri jónindegi basqarma basshylary, sonymen birge, Atyraý, Aqtóbe, Batys Qazaqstan jáne Mańǵystaý oblystarynyń jastar resýrstary men jastar uıymdarynyń ókilderi qatysty. Kóshpeli otyrysta jastar arasyndaǵy jumyssyzdyq máselesi keńinen talqyǵa salyndy. Qazir statıstıkalyq málimetke súıensek, elimizde 14 pen 29 jas aralyǵynda 4376148 jas bar dep esepteledi. Olardyń 116,1 myńy jumyssyzdar sanatyn quraıdy. Ótken jyly jastar arasyndaǵy jumyssyzdyq deńgeıi 5,5 paıyzdy qurap otyr. Jastardyń jumyssyzdyǵy jónindegi eń joǵary kórsetkish Soltústik Qazaqstan (7,6 paıyz), Jambyl (7,4 paıyz), Qyzylorda (6,7 paıyz) oblystarynda tirkelgen. Batys aımaqtaǵy jumyssyz jastardyń shoǵyry Mańǵystaý oblysyna (7,5 paıyz) tán ekeni jasyryn emes. (Atyraý oblysynda 3,5%, Batys Qazaqstan oblysynda 4,8%, Aqtóbe oblysynda 3,2%).
***
«Aıqyn» gazetiniń jazýynsha, elimizdegi turǵyn úı-kommýnaldyq sharýashylyq salasyndaǵy sybaılas jemqorlyq derekteri 2013 jyly eki esege asyp tústi. Eger 2012 jyly aımaqtardaǵyny aıtpaǵannyń ózinde Óńirlik damý mınıstrligine qarasty atalǵan salada 25 qylmystyq is qozǵalsa, ótken jyly ol 31-ge jetken. Sondaı-aq zańbuzýshylyqqa barǵan 49 qyzmetker de tártiptik jaýapkershilikke tartylǵan. Elmen etene aralasyp, qyzmet atqaratyn ákimdik pen mınıstrliktiń sharýashylyq bólimderinde paraqorlyq áreketteri nege kúrt kóterilip ketti? Astanada «Nur Otan» partııasy janyndaǵy sybaılas jemqorlyqqa qarsy áreket jónindegi respýblıkalyq Qoǵamdyq keńes kezekti otyrysyn turǵyn úı-kommýnaldyq sharýashylyqta beleń alǵan sybaılastyqqa arnady. Arnaıy qurylǵan komıssııanyń tekserýi negizinde anyqtalǵan derekterdi Májilis depýtaty Omarhan Óksikbaev baıandady. Bul jaıynda tolyq bilgińiz kelse, «Sheneýniktiń jumysyn kameramen qadaǵalaý kerek pe?» atty maqalany oqyńyzdar.
Osy basylymda «Sot júıesine senim artty» degen maqala jarııalandy. Qazaqstan Respýblıkasy Joǵarǵy sotynyń tóraǵasy Qaırat Mámı jergilikti sottardyń tóraǵalarymen ótkizgen respýblıkada sot tóreligin júzege asyrý jóninde 2014 jyldyń birinshi toqsanynda atqarylǵan jumystardyń qorytyndylary men aldaǵy kezeńdegi mindetteri týraly onlaın-keńeste osy másele keńinen qozǵaldy. Atap aıtsaq, Q.Mámı azamattardyń sottarǵa júginý sanynyń kóbeıý dınamıkasy saqtalyp otyrǵanyn, bul azamattardyń elimizdegi sot júıesine degen senim deńgeıiniń óskenin bildiretinin jetkizdi. Basqosýda qazirgi kezde respýblıkada sot tóreligin júzege asyrý sapasy aıtarlyqtaı jaqsara túskeni atap ótildi.
***
«Ana tili» gazetiniń sońǵy sanynda «Aýyldyń asyǵy qashan alshysynan túsedi?» atty kólemdi maqala berilgen. «Táýelsizdik alǵan soń, aýyldyń jaǵdaıynan góri ýrbanızatsııaǵa kóp ıek artqanymyz belgili. Aýyl jurtyn qalaǵa kóshirý - qalany qazaqylandyrýdyń birden-bir joly dep sanalǵandyqtan, aýyldy kórkeıtý ekonomıkanyń basym baǵyttarynyń qataryna kirmedi. Ondaǵy aǵaıyndy qala ortalyqtaryna kóship kelýge úndedik. Biraq aýyl halqynyń barlyǵy birdeı biz oılaǵandaı qalaǵa jóńkile qonys aýdara qoımady. Qalalyq bolýdy emes, aýyldyq bolyp qala berýdi qup kórgen jandardyń qarasy kóp bolyp shyqty», - dep jazady maqala avtory.
***
«Ekspress-K» basylymynyń búgingi sanynda « Medvejıa ýslýga » degen maqala basyldy. Astananyń bir top ekologtary Býrabaı qoryǵynyń ormandarynda ortalyqazııalyq aıýdy tiriltý ıdeıasyna bastamashy bolyp júr. Bul janýar osy jerde HH ǵasyrdyń basynda joıylyp ketken bolatyn.
