Sheneýniktiń qyzdaryn oqýǵa túsirýdi ýáde etken alaıaqqa qatysty sot otyrysy bastaldy

Tergeý materıaldaryna sáıkes, ol jábirlenýshilerge 17 mıllıon teńge shyǵyn keltirgen. Olardyń arasynda oblystyq Densaýlyq saqtaý basqarmasy basshysynyń burynǵy orynbasary da bar, dep habarlaıdy QazAqparat tilshisi.

Botagóz Bıekenova sot aldynda Qylmystyq kodekstiń "Alaıaqtyq" baby boıynsha jaýap berýde. Ol 2014-2016 jyldar aralyǵynda ártúrli ýádeler bere otyryp, 5 adamnan 17 mıllıon teńgeden astam aqsha aldy dep aıyptalýda.

  

Oblystyq sottyń baspasóz hatshysy Ilıada Dosova atap ótkendeı, Bıekenova jábirlenýshilerdiń birinen birge bıznes ashamyz degen jeleýmen 2 mıllıonnan astam teńge alǵan. Ekinshisi "QazaqOıl" JShS-ǵa jumysqa ornalastyryp berý úshin oǵan 368 520 teńge bergen. Astanadan «páter almaq bolǵan» taǵy bir jábirlenýshi 3 mıllıon 670 myń teńgege shyǵynǵa batsa, ákesin shetelde emdetkisi kelgen kelesi bir azamat 3 mıllıon 229 myń teńgesinen qaǵylǵan.

Іs materıaldaryna súıensek, eń kóp aqsha bergen (20 myń AQSh dollary) oblystyq Densaýlyq saqtaý basqarmasy basshysynyń orynbasary Almat Ermaǵanbetov bolyp shyqty. Ol bir qyzyn Nazarbaev Ýnıversıtetine, ekinshi qyzyn Nazarbaev Zııatkerlik mektebine oqýǵa túsirmek bolǵan. 

Aıta keteıik, Almat Ermaǵanbetov atalmysh Basqarmadaǵy qyzmetinen bosatyldy. Ol jumystan zańsyz shyǵarylǵandyǵyn aıtyp, Basqarmany sotqa berdi.