Sheneýnikterdi 25 paıyzǵa qysqartý maqsatyn 2021 jyly sheshemiz – Prezıdent

NUR-SULTAN. QazAqparat - Memleket basshysy Qasym-Jomart Toqaev sheneýnikterdi 25 paıyzǵa qysqartý maqsaty 2021 jyly sheshiletinin aıtty, dep habarlaıdy QazAqparat tilshisi.

Memleket basshysy Qazaqstan halqyna jyl saıynǵy dástúrli Joldaýynda memlekettik apparat pen kvazımemlekettik sektor qyzmetkerlerin qysqartýdy jedeldetýdi tapsyrdy. Osy oraıda olardyń sanyn bıyl 10 paıyzǵa, al kelesi jyly taǵy 15 paıyzǵa qysqartylady.

«Osy arqyly sheneýnikterdi 25 paıyzǵa qysqartý maqsatyn 2021 jyly sheshetin bolamyz. Nátıjelerge qaraı jáne tsıfrlandyrýdy eskere otyryp, ary qaraı qysqartý sheshimin qabyldaımyz. Únemdelgen qarjat esebinen qalǵan qyzmetshilerdiń eńbekaqasy ósedi», - dedi Qasym-Jomart Toqaev.