Sheneýnikterden urlanǵan djıp satyp alǵan Qaraǵandy turǵyny sotqa shaǵymdanbaq
QARAǴANDY. QazAqparat - Qaraǵandy qalalyq soty astanalyq sheneýnikterden elektrondy memlekettik satyp alý arqyly satyp alynǵan, urlanǵan djıp kóligine qatysty isti qaraýdan bas tartty. Sóıtip, isti Astana qalasynyń Saryarqa aýdandyq sotyna joldady, dep habarlaıdy QazAqparat.
Qylmystyq istiń materıaldary boıynsha, osydan birneshe jyl buryn Aqtóbede urlanǵan jol talǵamaıtyn 2006 jylǵy Toyota Land Cruiser Prado kóligi resmı túrde elektrondy saýdaǵa shyǵarylǵan. Urlanǵan kóliktiń memlekettik múlikterdiń tizimine qalaı kirip ketkenin polıtsııa qyzmetkerleri anyqtaýda.
Alǵash ret atalmysh kólik Aqtóbe oblysynda memlekettiń teńgerimine engizilgen. Ony Aqtóbe oblystyq sot aktilerin oryndaý jónindegi óńirlik departamenti qabyldaǵan. Budan soń kólik Astana qalalyq sot aktilerin oryndaý departamentine, keıin Astananyń ádilet departamentine berilgen.
Bıylǵy jyly kólik tizimnen shyǵarylyp, elektrondy saýdaǵa qoıylǵan. Qaraǵandy turǵyny ony 2017 jyldyń 18 sáýiri kúni 4 mln 762 myń 665 teńgege satyp alǵan.
Aıta keteıik, urlanǵany belgili bolǵan Toyota Land Cruiser Prado kóligin elektrondy saýdadan satyp alǵan Qaraǵandy turǵyny oǵan ketken shyǵyndy qaıtaryp alǵysy keledi. Sondaı-aq ol óziniń sheneýnikterdiń kesirinen osyndaı jaǵdaıǵa tap bolǵany úshin ótemaqy talap etpek. Ol kólikke jumsaǵan 4 mln 762 myń 665 teńgeni qaıtaryp, 476 myń 266 teńge ýaqytqa ketken shyǵyndy, 100 000 teńge moraldyq shyǵyn úshin ótemaqy talap etip, ózge de shyǵyndar úshin 264 465 teńge alýdy kózdep otyr.
