Sheneýnikter jýrnalısterden baspasóz hatshylarynyń kómegimen «jasyrynady» - K.Joldybaı
ASTANA. 8 qarasha. QazAqparat - Sheneýnikter jýrnalısterden ózderiniń baspasóz hatshylarynyń jáne baspasóz qyzmetteriniń kómegimen «jasyrynýda». Qazaqstannyń Bas redaktorlar klýbynyń prezıdenti Kenjebolat Joldybaı osyndaı pikirde.
Belgili jýrnalıst, barlyq problema baspasóz qyzmetiniń maqsaty bılik pen BAQ arasynda ózara baılanys ornatý bola tura, sheneýniktiń baspasóz hatshysy jumysyn óz vedomstvosyn «ózgelerdiń» aralasýynan qorǵaıtyn, ımıdj hatshy retinde atqaratyndyǵynda dep sanaıdy.
Astanada «BAQ pen memlekettik organdardyń ózara baılanysyn jaqsartý» taqyrybynda ótken semınar barysynda jýrnalısterdiń suraqtaryna jaýap bere kele, K.Joldybaı: «Baspasóz hatshylary - belgili bir mólsherde ózderiniń tikeleı basshylaryna táýeldi adamdar. Olar jalaqy alyp, «bastyǵynyń abyroıyn» qorǵaıdy - osyndaı is-áreketterimen jýrnalısterge qandaı da bir vedomstvonyń qyzmeti týraly aqparatty alýǵa kedergi keltiredi. Demek, bılik qurylymdary oqshaýlanyp, osydan baryp teris is-áreketter oryn alady», - dep málimdedi.
Osyǵan baılanysty, Klýb basshysy baspasóz qyzmetteri, birinshi kezekte, BAQ-pen tıimdi baılanys jasaýdyń ádisteri men tásilderin meńgerip alýy qajet ekenin aıtty. «Sonymen birge, keıde sheneýnikterdiń ózderi de baspasóz qyzmetimen jasyrynyp, jaýapkershilikten jaltarady. Olar ózderiniń ary men bedeline nuqsan keltirý dep sanap, vedomstvonyń kemshilikterin jarııalaýdan qashqaqtaıdy. Al shyn máninde bul bizdiń ortaq isimizge kedergi keltiredi», - dep jalǵastyrdy K.Joldybaı.
