«Sheneýnikter shikireımeıtin bolady» - respýblıkalyq basylymdarǵa sholý

ASTANA. 27 sáýir. QazAqparat - Qazaq aqparat agenttigi respýblıkalyq basylymdarda 27 sáýir, juma kúni shyqqan ózekti materıaldarǵa sholýdy usynady.

***

Eldegi saıası turaqtylyqtyń basty faktorlarynyń biri Qazaqstan halqy Assambleıasy ekendigi jaqsy málim. Búgin As­ta­nadaǵy Beıbitshilik jáne kelisim saraıynda Qazaqstan halqy Assambleıasynyń «Qazaq­stan joly: turaqtylyq, birlik, jańǵyrý» taqyrybyndaǵy HІH sessııasy ótkiziledi. Osy alqaly jıyn qarsańynda, keshe «Egemen Qazaqstan» gazeti Assambleıa mú­she­leriniń bir tobynyń qatysýymen dóń­ge­lek ústel basyndaǵy áńgime ótkizdi. Osy jaıt arqaý bolǵan maqala basylymda «Bárimiz birgemiz, sondyqtan berik irgemiz» degen taqyryppen jarııalandy. Jıyn barysynda sóz alǵan «Vaınah» Almaty oblystyq cheshen-ıngýsh qoǵamdyq-mádenı birles­tigi­niń qurmetti tóraǵasy Atsalım Idıgov: «Ultym sheshen bolsa da, men ózimdi naǵyz qazaqpyn dep sanaımyn. Óıtkeni, meniń týyp-ósken jerim - Qazaq­stan. Bizde keıbireýler «birinshi Otanym, ekinshi Otanym» dep aıtý­ǵa qumar. Ol, menińshe, du­rys emes. Otan degen adamnyń ózi týyp-ósken jeri. Osylaı aıtatyn bolsaq, bizdiń bárimizdiń Otanymyz qazaqtyń qasıetti jeri - Qazaqstan. Odan basqa Otan bizde joq», - deıdi.

***

«Alash aınasy» gazetiniń turaqty «Dat!» aıdarynda akademık Ábdimálik Nysanbaevpen aradaǵy suhbat «Ult rýhanııaty men mádenıeti, ıgiligi úshin eńbektengen adam ómirden sharshamaıdy» degen taqyryppen berilgen. Basylym tilshisiniń barlyq saýaldaryna tuşymdy jaýap bergen akademık. «Halyq jadynda jańǵyryp, onyń kúndelikti ómirimen astasyp, sabaqtasyp otyrmaıtyn tarıh - óli tarıh. Jansyz tarıh jer betinen joǵalǵan halyqtarda ǵana bolady. buryn qazaq eliniń tarıhy, qazaq halqynyń júrip ótken uly tarıhı joly qur derekter tizbegi túrinde samarqaý baıandalyp kelse, búgingi talap basqa. Biz osy tarıhymyzdy ulttyq jáne strategııalyq múdde turǵysynan halqymyzdyń izgilikke, eldikke umtylýynyń úzdiksiz saıası protsess retindegi, ult-azattyq kúres túrindegi qasiretinen sabaq alyp, qaıta jazyp shyǵýymyz kerek», - deıdi.

***

«Aıqyn» gazetiniń jazýynsha, Memlekettik basqarý akademııasynyń bilim alýshylary bolashaqta búkilálemdik bilim berý baǵdarlamasy negizinde oqytylady. Bul týraly keshe Prezıdent janyndaǵy Memlekettik basqarý akademııasynda ótken jas ǵalymdar, doktoranttar men magıstranttardyń ǵylymı-tájirıbelik konferentsııasynda aıtylǵan. «Demek, sheneýnikterimiz shikireımeıtin bolady. Óıtkeni sheteldegi sheneýnikter qashanda sypaıy, siz dep syzylyp  turady. Al bizde she? Memlekettik qyzmettegi orta býyn kadrlardyń óz ózderin jarty álemniń bıleýshisindeı sezinedi. Suraǵyńyzǵa jaýap berýge erinedi», - dep jazady basylym. Maqala «Sheneýnikter shikireımeıtin bolady» degen taqyryppen berilgen.

***

«Kazahstanskaıa pravda» gazetiniń jazýynsha, keshe Memleket basshysy Nursultan Nazarbaev «Shevron» kompanııasynyń basshylyǵyn qabyldady. Qazaqstan Prezıdenti elimiz úshin óte qıyn jyldary Qa­zaq­stan­ǵa kelgen «Shevron» kompa­nııa­symen tabysty yntymaq­tas­tyq ornaǵanyn atap ótti. «Biz óndirý kólemin odan ári ulǵaıtý nıetinde bolýymyz kerek. Sony­men qatar, kompanııa qazaq­stan­dyq mazmu­n­men aınalysýda, ju­mys­shylar­dyń 80 paıyzy Qa­zaq­stan azamat­tary. Sizderdiń tap­sy­rysta­ry­ńyz­dyń arqasynda otan­dyq ká­sip­oryndarda jańa ju­mys oryn­­dary ashylýda. Qa­zirgi ýaqytta Qazaqstanda ma­ńy­zy úlken ın­dýstrııalyq-ınno­vatsııalyq damý baǵdarlamasy iske asy­ry­lý­da. Biz úsh iri munaı nysany - Teńiz, Qashaǵan jáne Qarashy­ǵa­naq kásiporyndar qurý, óz ken oryndarynda qyzmet kór­setý úshin osy baǵdarlamaǵa belsendi qatysýy tıis dep esepteımiz»,  - dedi N.Nazarbaev.