Sheneýnikter sheteldik kólikterdi alý úshin nege ártúrli baǵa belgileıdi
ASTANA. QazAqparat - Qazaqstandyq sheneýnikter bir markadaǵy sheteldik qymbat kólikterdi ártúrli baǵamen satyp alýdy áli de jalǵastyryp jatyr. Bul týraly Parlament Májilisiniń jalpy otyrysynda depýtat Keńes Absatırov málim etti, dep habarlaıdy QazAqparat.
«Bıylǵy mamyrda «Aq jol» fraktsııasynyń saýalyna berilgen jaýapta shetelde óndirilgen avtomobılderdi alǵan mekeme basshylaryn tártiptik jaýapkershilikke tartý jaıynda, sondaı-aq memlekettik qyzmetshilerdiń ár sanaty úshin tıisti standarttardy aıqyndaý týrly aıtylǵan edi. Degenmen de Qazaqstanda osy laıyqty kólikter búginde shyǵarylyp jatsa da, memlekettik organdar burynǵysynsha avtokólik parkin basqa da sheteldik kóliktermen jańartýdy jalǵastyrýda», - dedi depýtat Absatırov Úkimet basshysynyń atyna joldaǵan saýalynda.
Belgili bolǵandaı, aǵymdaǵy jyldyń tek 9 aıynyń qorytyndysy boıynsha sheneýnikter 6 mlrd teńge somasynda sheteldik 500 kólikti satyp alǵan.
«Sonymen birge sanaty men markasy boıynsha birdeı avtokólik úshin baǵanyń ártúrli deńgeıde qalyptasýy eleýsiz qalmaı otyr. Máselen, «Toyota Camry» kólegine Almaty onkologııalyq ortalyǵy qarastyrǵan baǵa 7,5 mln teńgeni qurasa, Jambyl oblysyndaǵy Talas, Sarysý, Merke aýdandary ákimderiniń apparattary osy modelge 12-den 14 mln teńgege deıin baǵa belgilegen. Al Taldyqorǵan qalasy ákiminiń apparaty bul avtomobıldi satyp alýǵa 23 mln teńgeden astam qarajatty josparlap, kólik qunyn úsh esege arttyrǵan. Dál osyndaı jaǵdaı «Toyota Land Cruiser 200» avtokóligi boıynsha da qalyptasyp otyr. Bul turǵyda baǵanyń aıyrmashylyǵy 5 mln teńgeden asyp túsedi. Pavlodar qalasy ákiminiń apparaty osy modeldegi kólikti satyp alýǵa 20 mln teńgeni eskerse, Qostanaı oblysy Áýlıekól aýdany ákiminiń apparaty 25 mln 125 myń teńgeni qarastyrǵan. Mundaı basqa mysaldar barshylyq», - dedi depýtat.
