Sheneýnikter ózderiniń kiristeri men shyǵyndaryn jarııalap otyrýǵa mindetteledi
ASTANA. QazAqparat - Sheneýnikterge paıda men shyǵyndaryn jarııalaý mindeteledi.
Bul týraly búgin TMD elderiniń sybaılas jemqorlyqqa qarsy kúres memleketaralyq keńesiniń otyrysynda QR Prezıdentiniń kómekshisi, QR Qaýipsizdik keńesiniń hatshysy Nurlan Ermekbaev málim etti.
«Prezıdent avtonomdy, kásibı memlekettik apparatty qurýdy, zań ústemdigin qamtamasyz etýdi, ekonomıkanyń ındýstrıalandyrý men ártaraptandyrýdy, qoǵam aldynda esep beretin ashyq Úkimetti qurýdy tapsyrdy. Osy tapsyrmalardy oryndaý maqsatynda bizdiń elde jemqorlyqty monıtorıngileý, jemqorlyq táýekelderin taldaý sharalaryn engizetin «Jemqorlyqqa qarsy kúres týraly» jańa zań qabyldandy. Qarjylyq baqylaý sharalary kúsheıtildi. Eger buryndary memlekettik laýazymdy tulǵalar men kvazımemlekettik sektordyń sýbektileri tek ózderiniń paıda kózderin jarııalap kelgen bolsa, endi deklaratsııada shyǵyndaryn da kórsetýi mindetteletin bolady. Kiris pen shyǵyndaryn «A» korpýsynyń saıası jáne ákimshilik qyzmetkerleri - joǵary laýazymdy tulǵalar, Parlament depýtattary, sýdıalar, kvazımemlekettik sektordyń basqarýshy tulǵalary kórsetýleri shart. Mundaı málimetter mindetti túrde jarııalanyp otyrýy tıis», - dep atap ótti ol.
