Sheneýnikter qyzmettik kólikterge qansha qarjy jumsaıdy
ASTANA. QazAqparat - Qazaqstandyq sheneýnikter otandyq kólikterdi kóptep ala bastady. Osy ózgeristerge Qazaqstannyń avtomobıl salasy kásiporyndarynyń odaǵy da yqpal etti, dep xabarlaıdy QazAqparat tilshisi.
Uıymnyń dırektorlar keńesiniń tóraǵasy Oleg Alferovtyń aıtýynsha, byltyr alǵashqy alty aıda memlekettik satyp alýlar arqyly sheteldik kólikterdiń saýda-sattyǵy 12 protsentti quraǵan. Bıyl atalǵan kórsetkish 5 protsentke tómendedi.
«Bylaısha aıtqanda, búginde memlekettik organdar satyp alatyn árbir 20-shy kólik shetelden jetkiziledi. Ótken jyly birinshi jartyjyldyqta 375 sheteldik kólik satyp alynǵan bolatyn. Sonyń bárine 4 mlrd teńge jumsaldy. Bıyl alty aıda memlekettik organdarǵa tek 92 kólik qana shetelden jetkizildi. Oǵan 677 mln teńge ketti. Biz atalǵan máseleni byltyrdan beri talqylap kelemiz. Osy sharalardyń yqpaly da bar. Biz Parlament Májilisimen de, Úkimetpen de, quziretti memlekettik organmen de kelissózder júrgizip kelemiz. Bul kelissózderdiń nátıjesi joq emes. Bizdiń usynystarymyz eskeriledi dep senemiz. Sonyń arqasynda memlekettik satyp alýlardy barynsha jetildirýge bolady», - dedi O.Alferov Astanada ótken baspasóz máslıxatynda.
Onyń sózine qaraǵanda, uıymnyń negizgi maqsaty - memlekettik organdarda sheteldik kólikterdi satyp alýdy barynsha azaıtý. Tipti, múldem tyıym salý qajet. Ol úshin burynǵy shekteýdi qaıta engizý kerek.
