Sheneýnikter quny 2 AEK syılyq alǵany úshin 1,8 mıllıon teńge aıyppul tóleýi múmkin
Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov ákimshilik sybaılas jemqorlyq quqyq buzýshylyqtardyń naqty quramy týraly egjeı-tegjeıli aıta kele, memlekettik fýnktsııalardy oryndaýǵa ýákilettik berilgen nemese oǵan teńestirilgen tulǵalardyń jaýapkershiligi týraly baıandady. Atap aıtqanda, ózi nemese deldal arqyly zańsyz materıaldyq syıaqyny, syılyqtardy nemese kórsetiletin qyzmetterdi usynǵan adamdardyń paıdasyna áreketteri (áreketsizdigi) nemese jeńildikter berý úshin, eger mundaı áreketterde qylmystyq jazalanatyn is-áreket belgileri bolmasa kózdelgen jaýapkershilik týraly aıtyp berdi.
«Bul jaǵdaıda joǵaryda atalǵan laýazymdy tulǵalarǵa 600 aılyq eseptik kórsetkish nemese 1,8 mln teńge kóleminde aıyppul salynýy múmkin», – dedi O.Bektenov.
Ol qylmystyq jazalanatyn is-áreket belgileriniń joqtyǵyn túsindire otyryp: «Eger alynǵan zańsyz syıaqy nemese syılyq somasy 2 aılyq eseptik kórsetkishten aspasa, ol búgingi kúni 5 834 teńgeni quraıdy, aldyn ala ýaǵdalastyq bolmasa nemese syıaqyny qorqytyp almasa, onda mundaı quqyq buzýshylyq qylmystyq jaýaptylyqqa ákep soqpaıdy jáne ákimshilik tártippen jazalanady», - dep atap ótti.
Eske sala keteıik, sheneýnikke 6 myń teńgeniń syılyǵyn berse 4,5 mln teńgege deıin aıyppul salynatynyn habarlaǵan bolatynbyz.
Esterińizge sala keteıik, 20 naýryzda Memleket basshysy «Qazaqstan Respýblıkasynyń Ákimshilik quqyq buzýshylyqtar týraly Kodeksine ózgerister engizý týraly» Zańǵa qol qoıdy.
Zań sáýirdiń 5-inen bastap qoldanysqa engizildi.
Atalǵan Zań aıasynda ákimshilik sybaılas jemqorlyq quqyq buzýshylyqtar týraly hattamalar jasaý quzireti Sybaılas jemqorlyqqa qarsy qyzmetke bekitildi.