Sheneýnikter kontrabandalyq kólikterdi zańdastyrý úshin qylmystyq top qurǵan
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev Ońtústik Qazaqstan oblysynda kontrabandalyq kólikterdi zańdastyryp kelgen qylmystyq topty jergilikti sheneýnikter basqaryp kelgenin málim etti, dep habarlaıdy QazAqparat.
«Ońtústik Qazaqstan oblysynda kontrabandalyq kólikterdi tirkeýmen aınalysqan tirkeý-ekonomıkalyq bóliminiń joǵary laýazymdy qyzmetkerleri qurǵan qylmystyq top áshkerelendi», - dedi ol búgin QR Parlamenti Senatynda ekonomıkalyq qylmystardyń aldyn alýǵa qatysty ótken «dóńgelek ústelde».
Agenttik basshysynyń orynbasary, atalmysh toptan memlekettik bıýdjetke salynǵan shyǵyn kólemin jarııa etti.
«Búgingi tańda 1 myńǵa jýyq kólik anyqtaldy, tólenbegen baj salyǵynyń kólemi 4,4 mlrd. teńgeni quraıdy. Oblystyq tirkeý-ekonomıkalyq bóliminiń basshysy, polkovnık Japarovtyń basshylyǵyndaǵy qylmystyq toptyń 30 múshesi qamaýǵa alyndy, tergeý júrgizilýde», - dedi Alık Shpekbaev.
