Sheneýnik bastyǵynyń elektrondy qoltańbasymen jarty mlrd teńgeni zańsyz aýdarǵan

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi jarty mıllıardqa jýyq bıýdjet qarajatyn bankke zańsyz aýdarý faktisin anyqtady, dep xabarlaıdy QazAqparat tilshisi.

Agenttiktiń resmı ókili Janna Bastarovanyń aıtýynsha, sybaılas jemqorlyqqa qarsy is-qımyl jónindegi Ulttyq bıýronyń Astana qalalyq departamenti qyzmet babyn asyra paıdalaný faktisin anyqtaǵan bolatyn.

«Qazirgi kezde «Astana qalasy boıynsha kólik jáne jol-kólik ınfraqurylymyn damytý» memlekettik mekemesiniń bólim basshysyna qatysty qylmystyq is tergelýde. Ol basqarma basshysynyń kelisimin almaı, onyń elektrondy tsıfrlyq qoltańbasyn paıdalaný arqyly turǵyn alaptarynyń syrtqy ınjenerlik jeliler qurylysy úshin merdiger mekemeniń esepshotyna 414 mıllıon teńgeniń bıýdjet qarajatyn zańsyz aýdarǵany úshin kúdikti dep tanyldy. Departamenttiń ótinish xaty negizinde sotpen atalǵan qarajatqa arest salyndy. Sotqa deıingi tergeý aıaqtalǵan soń, «Astana banki» AQ taratý komıssııasyna atalǵan 414 mıllıon teńgeni basqarmanyń esepshotyna qaıtarý jóninde xat joldaý josparlanyp otyr. Tergeý jalǵasýda», - dedi J.Bastarova Astanada ótken baspasóz máslıxatynda.

Aıta keteıik, búgingi brıfıngte ústeme jumys máselesi de sóz boldy. Agnttik ókilderi memqyzmetkerlerge artyq jumys istetken mınıstrlikterdi atady.