Sheneýnik balasynyń qatysy bar degen kólik oqıǵasy jelide qyzý talqylandy
NUR-SULTAN. QazAqparat – Elordada jaıaý júrginshiler ótkelinde jasóspirimdi kólik qaǵyp ketti. Bul oqıǵa jelide qyzý talqylanýda, dep habarlaıdy QazAqparat tilshisi.
«Juma kúni men astanadaǵy sol jaǵalaýdyń qaq ortasynda bolǵan jol-kólik oqıǵasynyń kýágeri boldym. 1999 jyly týǵan jas jigit jaıaý júrginshiler ótkelinde jasóspirimdi qaǵyp, oqıǵa ornynan qashyp ketti. Oqıǵa ornynan izin sýytqanymen qoımaı kóligin fıtnes-ortalyqtyń aýlasyna alańsyz qańtaryp, jattyǵýǵa kirispekshi boldy. Qasymda turǵan taǵy bir qyzben birge dereý jol polıtsııasy men jedel járdem shaqyryp úlgerdik», - dep jazdy Sarah Bersan atty Facebook qoldanýshysy.
Kýágerdiń aıtýynsha, zardap shekken jasóspirim 2004 jyly týǵan eken. Ata-anasy bolmaǵandyqtan, ınsýlttan keıin sal bolyp jatqan ájesimen birge turatyn kórinedi. Al ony qaqqan kólik ıesi 14 mamyrda nebári 22 jasqa tolady eken. Oqıǵa kýágeri ol jigittiń ákesi sheneýnik ekenin de anyqtaǵan.
Nur-Sultan qalasynyń polıtsııa departamenti jol-kólik oqıǵasy bolǵanyn rastap otyr.
«Aǵymdaǵy jyldyń 30 sáýirinde saǵat 15.13-te 21 jastaǵy júrgizýshi «Toyota Camry» markaly avtokólikpen Syǵanaq kóshesi jaqtan Túrkistan kóshesiniń boıymen kele jatyp № 2 úıdiń tusynda 2004 jyly týǵan kámeletke tolmaǵan jaıaý júrginshini qaǵyp ketti. Zardap shegýshi jaıaý júrginshilerge arnalǵan bólikten ótip bara jatqan. Qazir zardap shekken bala em qabyldaýda. Alynǵan dene jaraqattarynyń aýyrlyq dárejesin sot-medıtsınalyq saraptama anyqtaıdy. Tıisinshe, júrgizýshiniń áreketine quqyqtyq turǵyda baǵa beriledi. Atalǵan fakti boıynsha aldyn ala tergeý júrip jatyr», - deıdi departament mamandary.
Bes kún buryn bolǵan oqıǵany jurtqa jarııa etken jeli qoldanýshysyna Nur-Sultan qalasyndaǵy ákimshilik polıtsııa basqarmasynyń basshysy Eljan Chýpekov jón siltedi.
«Sara Bersan, ákimshilik polıtsııa bóliminiń basshysy Toqjumanov Baýyrjanmen baılanysyńyz. Bul materıal qalalyq polıtsııa departamentiniń bastyǵy general E.S.Sádenovtiń jeke baqylaýynda. Jasóspirimniń jalǵyz qamqorshysy da aýrýhanada jatqanyn eskersek, oqıǵa shynymen de nazar aýdarýǵa turarlyq» - dep jaýap qatty Eljan Chýpekov.
