«Shenchjoý-21» kemesiniń ekıpajy alǵash ret ashyq ǵaryshqa shyǵýǵa daıyndalyp jatyr

ASTANA. KAZINFORM – Qytaıdyń «Shenchjoý-21» ǵarysh kemesiniń ekıpajy aldaǵy kúnderi alǵashqy ashyq ǵaryshqa shyǵady. Bul týraly QHR-dyń Pılottyq ǵaryshtyq ushýlar baǵdarlamasy basqarmasy (CMSA) habarlady, dep jazady Sınhýa.

1 qarasha kúni «Shenchjoý-21» ekıpajy qytaılyq orbıtalyq stantsııaǵa kelgen sátten bastap birqatar mańyzdy mindetterdi oryndady. Olardyń qatarynda ekıpajdy rotatsııalaý, stantsııa platformasyna tehnıkalyq qyzmet kórsetý, arnaıy qorlardy tekserý jáne retke keltirý, sondaı-aq ekıpajdyń ómiri men densaýlyǵyn qamtamasyz etý sharalary bar.

CMSA málimetinshe, ekıpaj tótenshe jaǵdaılarǵa áreket etý boıynsha jattyǵýlar ótkizgen, sondaı-aq stantsııadaǵy robottandyrylǵan manıpýlıatorlarmen jumys isteýdi pysyqtaǵan.

Ǵylymı tájirıbeler men zerthanalyq jumystar josparǵa sáıkes turaqty túrde oryndalyp jatyr.

«Shenchjoý-22» kemesi kelgennen keıin ekıpaj jańa jetkizilgen jabdyqtar men júk partııasyn synaqtan ótkizip, olardy júıeledi.

CMSA habarlaýynsha, «Shenchjoý-21» ekıpajy ózderin jaqsy sezinedi, al stantsııa qalypty rejımde jumys istep tur. Bul ashyq ǵaryshqa josparlanǵan shyǵýdy qaýipsiz oryndaýǵa tolyq múmkindik beredi.

Aıta keteıik, buǵan deıin Qytaı «Shenchjoý-22» ǵarysh kemesin ushyrǵan bolatyn.