Shemonaıhadaǵy tótenshe jaǵdaı: Ahmetov úısiz qalǵandarǵa ýáde berdi
ÓSKEMEN. QazAqparat - Shyǵys Qazaqstannyń Shemonaıha aýdanynda Úbe ózeniniń betimen seń júrip, muz keptelisiniń kesirinen 58 úıdi sý basty, dep habarlaıdy QazAqparat tilshisi.
Sý úılerge tańǵy saǵat 7.30-dan bastap kire bastaǵan. Osy oqıǵa saldarynan aýdanda dereý tótenshe jaǵdaı jarııalanǵan bolatyn.
Sońǵy 3 kúndegi jylymyq pen jańbyr saldarynan ózen betindegi muzdyń kóbesi sógilip, seń júrgen. Qalyńdyǵy 1 metrden asatyn muz kesekteri Shemonaıha qalasyna kire beristegi aspaly kópirge keptelip, saldarynan jaǵadaǵy úılerge sý kirgen. Turǵyndardan dabyl túsken bette tótenshe jaǵdaı mamandary men jergilikti ákimdik músheleri muzdy qoparǵysh zatpen jarýǵa sheshim qabyldaǵan eken. Onyń nátıjesinde úılerge kirgen sýdyń beti qaıtyp, keptelis seıilgen. Sý alǵan úılerdi oblys ákimi Danıal Ahmetov aralap kórdi.
«Aınaldyrǵan 20 mınýttyń ishinde ózen sýy úıge kirdi. Kórshilerdiń malyn bosatyp úlgerdik. Basynda jańbyr sýynyń áseri shyǵar dep oılap qaldyq. Muz kesekteri aýlamyzǵa kire bastaǵan kezde seń júrgenin biraq bildik. Dereý qala ákimine qońyraý shaldyq. Olar jedel sheshim qabyldap, 3 saǵattyń ishinde sý arnasyna qaıtty» - deıdi apat týraly quzyrly organdarǵa habarlaǵan Vera Shestakova.
Povstancheskaıa kóshesiniń eń shetinde turǵan zeınetkerdiń úıine kirý múmkin bolmaı qalypty. Sý irgetastan asyp, terezege jete jazdaǵan. Danıal Ahmetov osyǵan uqsas jaǵdaıǵa túsken birneshe úıdi aralap, apattan esin jıyp úlgermegen halyqtyń kóńilin jaılandyrdy.
«Bul jerde bireýden kiná izdeýge kelmeıdi. Ózen betimen seń júrgen. Jaýapty mamandar der kezinde durys sheshim qabyldap, keptelisti qoparǵysh zatpen jarǵan eken. Sonyń arqasynda sý tez qaıtty. Jaǵalaý áli de bekemdeletin bolady. Barlyq úıdi arnaıy qurylǵan komıssııa qarap, turýǵa jaramsyz bolǵandaryn basqa úımen nemese pátermen almastyramyz. Al jaı ǵana búlingenderin jóndep beremiz. Jıahaz ben ózge de múlikterińiz búlinse shyǵynyn toltyramyz. Oǵan kúmán bolmasyn» - dedi oblys ákimi.
Danıal Ahmetov sý basqan 58 úıdiń 10-nan astamy jaramsyz kúıge túskenin atady. Olardyń ıelerine aýdan ortalyǵynan baspana berilmek. Qala ákimi Murat Jeldibaevtyń aıtýynsha, aýdan ortalyǵynda 40-qa jýyq úı satalymda turǵan kórinedi. Al ózen arnasyna tym jaqyn ornalasqan úıler birjola qaýipsiz aımaqqa kóshiriletin bolady. Qazirgi tańda 11 bala men zeınetker áleýmettik nysandarǵa ornalastyrylǵan. Qalǵan úılerdiń turǵyndary týystaryn panalaýda.
