Shemonaıhada jaýyr bolǵan jylý máselesi sheshildi - ShQO
ASTANA. QazAqparat - ShQO ákimi Danıal Ahmetov Shemonaıha aýdanyna jasaǵan jumys saparynda Ýst-Talovka aýylyndaǵy jylý qazandyǵynyń jaıymen tanysty. Aıta ketý kerek, jylý berý nysany tek atalmysh eldimekendi emes, sonymen qatar aýdan ortalyǵy men óndiristik ǵımarattardy da qamtyp otyr, dep habarlaıdy óńirlik ákimdiktiń baspasóz qyzmeti.
Mundaǵy jylý jelileri 2009 jyldan beri jóni túzý jóndeý kórmegen edi. «Shyǵys-Energo» JShS qaramaǵyna ótkennen keıin ǵana jaǵdaıy ońala bastady. Kásiporyn óz qarajatyna qazandyqqa jóndeý júrgizip, bir ǵana jylýmen qamtý joldarynyń 6 ýchaskesin jańartý úshin 68 mıllıon teńge jumsady. 
«Shemonaıhada jyldar boıy qordalanǵan másele sheshimin tapty. Endi basqa da jaǵdaılarǵa, máselen jańa turǵyn úı salý isin qolǵa alamyz. Bul rette biz ınjenerlik ınfraqurylym jelisin tartýǵa qarjy bólemiz, sondaı-aq, bıýdjet salasynda qyzmet etip jatqan muǵalimder men dárigerlerdiń de páter alý joldaryn qarastyramyz», - dedi ShQO ákimi Danıal Ahmetov. 
Aımaq basshysy jóndeý jumystary tolyq aıaqtalǵan soń, turǵyndar jazda da ystyq sýmen qamtamasyz etiletindigin jetkizdi.
