Shemonaıhada kúıip qalǵan 11 jasar bala: Polıtsııa túsinik berdi
ÓSKEMEN. QazAqparat -Shemonaıha qalasynda ózinen úlken jasóspirimderdiń áreketinen kúıip qaldy degen 11 jastaǵy balaǵa qatysty tyń derekter belgili boldy, dep habarlaıdy QazAqparat tilshisi.
Oqıǵa 1 jyl buryn bolǵanymen, aqsha bopsalaý týraly málimetter endi ǵana tarap jatyr. Zardap shegýshi taraptyń aıtýynsha, 14-15 jastaǵy eresek oqýshylar izbasarlarynan aqsha bopsalap kelgen.
«Nurálıdiń usaq reketırler aldyndaǵy «qaryzy» 3 myń teńgege jetken. Olar balany qoraǵa aparyp, tóbesinen benzın quıyp, ot qoıǵan. Saldarynan denesiniń 85 paıyzyn kúıik shaldy. Bir jyldyń ishinde ol 9 ret jasatty. Buzaqylardyń jasy kámeletke tolmaǵandyqtan, sot úsh otbasyna 1 mln teńge aıyppul salyndy» - delingen ǵalamtordaǵy habarlamalarda.
Aýyr jaǵdaıǵa túsken otbasynyń janashyrlary áleýmettik jeliler arqyly kıim-keshek pen azyq-túlik kúıinde, aqshalaı da kómek jınaýda. Kúıik shalǵan Nurálı Seıitbattaluly Óskemendegi ana men bala ortalyǵynda uzaq em alyp, Astanaǵa jetkizilgen bolatyn. Jalǵyzilikti áıeldiń odan basqa 3 balasy taǵy bar.
Shyǵys Qazaqstan oblystyq ishki ister departamenti balanyń kisi qolynan kúıik alǵanyn rastap otyr. Alaıda, aqsha bopsalaý faktisin joqqa shyǵardy.
«Bul is boıynsha Shemoanıha aýdandyq ishki ister bólimi sot aldy tekserý júrgizgen bolatyn. Tergeý derekteri boıynsha, 2017 jyldyń 5 shildesinde 11-13 jastaǵy tórt bala kóshelerdiń birinen mys kabel taýyp alady. Ony arshyp ótkizý úshin, úıden benzın ákep ot qoıady. Olarǵa saǵat 17.30 shamasynda Nurálı qosylady. Janyp jatqan kabelge benzın ústeý kezinde jalyndy jel jarpyp, ot Nurálıdiń jeıdesine tıgen. Jalyn onyń ústindegi kıim men shashyna jalǵasqan. Oqıǵaǵa kináli balalar qaýpsizdik erejesine qaıshy iske barǵany úshin jazaǵa tartylýy múmkin edi. Biraq jastary kámeletke tolmaǵandyqtan, is toqtatylǵan» - deligen departament bergen aqparatta.
Aıta ketsek, bul iske sol kezdegi bala quqyqtary jónindegi ýákiletti tulǵa Zaǵıap Bálıeva aralasyp, balany amerkalyq dárigerge qaratqan bolatyn. Kúıikti saldarynan Nurálıdiń keıbir bulshyqetteri qozǵalyssyz qalǵan. Ony qalpyna keltirý úshin plastıkalyq ota jasaý qajet. Amerıkalyq maman balanyń bulshyqetteri tolyq jetilmegendikten ota jasaýǵa erte ekenin aıtypty. Qazir ol túrli ekpelerdiń kómegimen emdelýde.
