Shell Qazaqstanda jumysyn jalǵastyrýǵa nıetti - Energetıka mınıstri

ASTANA. KAZINFORM – Shell kompanııasy buqaralyq aqparat quraldarynda taraǵan ketý yqtımaldylyǵy týraly habarlamalarǵa qaramastan, Qazaqstanǵa ınvestıtsııa salýyn toqtatpaıdy. Bul týraly Energetıka mınıstri Erlan Aqkenjenov aıtty.

Buǵan deıin kompanııa ótemaqy talaptaryna baılanysty eldegi ınvestıtsııalaryn ýaqytsha toqtatady degen aqparat taraǵan bolatyn. Alaıda, mınıstrdiń aıtýynsha, Shell kompanııasynyń ókili Sıýzann Kýgan oǵan BAQ Shell kompanııasynyń bas dırektory Vael Savannyń sózderin qate túsindirgenin jetkizgen.

- Shell kompanııasyna tıisti suraý joldadyq. Biraq, Shell ókili Sıýzann Kýgan ótken aptada maǵan arnaıy kelip, buqaralyq aqparat quraldary kompanııa basshysynyń sózderin durys túsindirmegenin aıta alamyn. Negizinde jaǵdaı múlde basqasha bolǵan. Kompanııa Qazaqstanda odan ary qaraı da damýyn qalaıdy. Qazirgi tańda olar gaz óndirý úshin qarastyryp jatqan ken oryndarynyń biri — sonyń dáleli. Olar Qazaqstanǵa ınvestıtsııa sala beredi. Degenmen, Energetıka mınıstrligi resmı suraý joldaǵandyqtan Shell kompanııasynyń resmı jaýabyn kútýimiz qajet, - dep túsindirdi Erlan Aqkenjenov Aqordada.

Sondaı-aq ol Qashaǵan ken ornyn ıgerýdiń ekinshi kezeńiniń iske qosylýy qandaı da bir kompanııanyń qyzmetine baılanysty emes ekenin atap ótti.

- Qashaǵandy ıgerýdiń ekinshi kezeńi bastalǵan joq. Onyń ózge sebepteri bar. Bul qandaı da bir kompanııanyń qalaýyna nemese qalamaýyna baılanysty emes. Onda naqty tehnıkalyq qıyndyqtar bar. Barlyǵy Qashaǵannyń tehnıkalyq jaǵdaılaryna táýeldi. Jalpy, Qashaǵan – bul tehnologııalyq turǵyda kúrdeli ken orny. Onda qabat qysymy qalyptan tys joǵary, kúkirtsýtek pen basqa da zııandy qospalardyń mólsheri óte kóp, — dedi mınıstr.

Buǵan deıin Qashaǵan ken ornyn ıgerýshi NCOC kompanııasy Kazinform saýalyna joldaǵan jaýapta Qazaqstan Úkimetiniń ekologııalyq aıyppulyn halyqaralyq tórelikte daýlaıtyndaryn rastaǵan edi.