Shekten tys ýrbanızatsııany baıaýlatýdyń joldary qandaı
ASTANA. KAZINFORM — Elimizdegi megapolısterge mıgratsııa aǵyny óte joǵary. Іri qalalarda halyq sany óskenmen, áleýmettik sektor qarqynǵa ilese almaı otyr.
Bul jóninde Ekonomıkalyq zertteýler ınstıtýtynyń 65 jyldyǵyna arnalǵan dıskýssııalyq jıyn barysynda bas ǵylymı qyzmetker Sara Alpysbaeva málimdedi.
— Astana, Almaty tárizdi megapolısterge mıgratsııa asa qarqyndy júrip jatyr. Biraq bul shaharlardyń óndiristik qýaty qazirgideı halyq aǵynyn kótermeıdi. Bylaı qarasańyz, qala jurtynyń sany ósip, ýrbanızatsııa júrip jatqan sııaqty. Biraq sonshama buqaranyń jumyspen qamtylýy jáne t. b. áleýmettik máselelerdiń sheshilý deńgeıi joǵarylamaı otyr. Saldarynan ekonomıka ǵylymynda «jalǵan ýrbanızatsııa» degen jańa termın paıda boldy, — dedi ol.
Biz mamannan bul túıtkildi sheshý joldaryn suradyq.
— Bul saýalǵa jaýap berý qıyn. Buǵan deıin iri qalalarǵa, sonyń ishinde Astanaǵa mıgratsııany shekteýge talpynǵan áreketter boldy. Menińshe, bul — adam quqyǵyn buzatyn is. Sebebi, ár azamat óz elindegi qaı shaharda turyp, jumys isteıtinin tańdaýǵa quqyly, — dep túsindirdi zertteýshi.
Sodan soń, ol Qytaı tájirıbesin mysalǵa keltirdi. Búginde Shenchjen shaharynda 18 mıllıondaı adam turady.
— Shenchjende ómir súrý deńgeıi, jalaqy joǵary. Syrttan bir maman kelse, oǵan áýeli jumys usynyp, jaǵdaıyn jasaıdy. Alaıda bir jyldyń ishinde salaǵa naqty úlesin, paıdasyn kórsetýi tıis. Eger nátıjesi kóńil kónshitpese, onda bul azamattyń atalǵan qalada odan ári turyp, jumys isteýge quqyǵy joq. Bul — Shenchjen shaharynda qoldanylatyn tásil. Sol sekildi ár memlekettiń bul baǵytta óz ustanymy, máseleni retteýdiń ádisi bar, — dedi Sara Alpysbaeva.
Onyń aıtýynsha, Qazaqstanda bul túıtkildi sheshý úshin júıeli zertteýler júrgizý qajet.
Aıta keteıik, buǵan deıin atalǵan sarapshynyń ıntellektýaldyq mamandyq ıeleri kýrerlerden kóp tabys tabý úshin ne isteý kerek ekeni jónindegi pikirin jarııalaǵanbyz.
