Shekten tys kóp aýlaý saldarynan skýmbrııa balyǵy azaıyp barady
ASTANA. KAZINFORM – Balyq aýlaý kásibi saldarynan atlantıkalyq skýmbrııa popýlıatsııasy quryp barady, dep habarlaıdy Kazinform menshikti tilshisi.
Brıtanııalyq «Teńiz ortasyn qorǵaý qoǵamy» qaırymdylyq qorynyń málimetteri boıynsha, Atlant muhıtynyń soltústik-shyǵys bóliginde skýmbrııa tuqymy joǵalyp ketýge taıaý. Buryndary balyqtyń bul tuqymy turaqty bolatyn jáne ony aýlaý tabıǵı tepe-teńdiktiń saqtalýyna áser ete qoımaıtyn. Degenmen sońǵy jyldary balyqshylar balyq aýlaýǵa berilgen keńes shegin 23% asyra paıdalanatyn bolǵan. Sonyń saldarynan skýmbrııa tuqymy kúrt azaıa bastady.
Endi jylyna eki ret «Balyq tańdaýdaǵy keńes» anyqtamalyǵyn jarııalaıtyn «Teńiz ortasyn qorǵaý qoǵamy» qaırymdylyq qory aýlýǵa keńes beriletin balyqtar tiziminen skýmbrııany alyp tastady.
Oǵan balama retine qaırymdylyq qory sardına, maıshabaq sııaqty sany ázirge turaqty balyq tuqymdaryna nazar aýdarýǵa keńes beredi.
- Bir kezderi turaqty bolyp kelgen teńiz ónimderi kóziniń joǵalyp bara jatqany alańdatady. Skýmbrııa kóptegen elderde shekten tys mólsherde aýlanyp jatyr jáne bolashaqta onyń qory qalpyna kelmeýi múmkin, - deıdi «Balyq tańdaýdaǵy keńes» jobasynyń menedjeri Alısa Mýr.
Anyqtamalyqta kórsetilgen baǵalaý ádisi tutynýshylar úshin tús shkalasyn (jasyl, sary, qyzyl) al bıznes ókilderi úshin baldyq júıeni qarastyrady. 1 nemese 2 (jasyl) reıtıngindegi balyq úılesimdi sanalady, 3 nemese 4 (sary) jaqsartýdy qajet etedi. 5 sanatyndaǵy (qyzyl) balyqqa múmkindiginshe jolamaǵan jón. Meıramhanalar men saýda jelilerine baǵalaý kórsetkishi 3-ten tómen ónimderdi usynýǵa keńes beriledi.
Atlant muhıtynyń soltústik-shyǵys bóligindegi tereńdigi otasha tralmen aýlanǵan skýmbrııanyń baly 3 pen 4-ke deıin túsirilgen. Bul degenińiz ol balyq túrin satýdan bas tartqan jón degendi bildiredi.
Balyqty dúkender men qoǵamdyq tamaqtaný oryndaryna jetkizýshiler mundaı aýlaý tásilderin keńinen qoldanady. Qazir qarmaqpen aýlanatyn balyqtyń ózi burynǵy 2 baldyń ornyna 3 balmen baǵalanady.
Atlant muhıtynyń soltústik-shyǵysynda skýmbrııany shekten tys aýlaıtyn elderdiń qataryna Norvegııa, Islandııa, Farer araldary men Ulybrıtanııany jatqyzýǵa bolady.
Osyǵan deıin Qazaqstanda elektrli qarmaqpen balyq aýlaǵandar 23 mln teńge aıyppul tóleýi múmkin ekeni týraly jazdyq.