«Shekten shyqqan sheneýnikter shettetiledi» - respýblıkalyq basylymdarǵa sholý
***
«Egemen Qazaqstan» basylymynyń jazýynsha, keshe Qazaqstan Respýblıkasynyń Prezıdenti Nursultan Nazarbaev memlekettik saparmen Qyrǵyz Respýblıkasyna keldi. Qazaqstan basshysyn «Manas» áýejaıynda Qyrǵyz Respýblıkasynyń Prezıdenti Almazbek Atambaev qarsy aldy. Yqylym zamandardan beri qazaq pen qyrǵyzdyń dıplomatııalyq qarym-qatynasy úzilmegen, táýelsizdik jyldarynyń bederinde talaı yntymaqtastyq qujattarmen bekemdelgen desek te, bul sapar Elbasynyń Qyrǵyz Respýblıkasyna jasaǵan alǵashqy memlekettik sapary bolyp tabylady. Árıne, bul eki el arasynda osy jyldarda barys-kelis, alys-beris bolmady degendi bildirmeıdi. Alaıda, 2010 jylǵy Osh oqıǵasynan beri bul elge TMD-dan birde-bir memleket basshysynyń joly túspegenin eskersek, Elbasynyń bul saparynyń salmaǵy arta túsedi.
TMD keńistiginde ǵana emes, saıasattyń álemdik aıdynyndaǵy aıtýly saıasatkerdiń Qyrǵyzstanǵa arnaıy kelisinen aıyr qalpaqty aǵaıyndar kóp jaqsylyq kútkeni aqıqat. Bul maqala gazettiń búgingi sanynda «Nursultan NAZARBAEV: Qazaqtaı baýyry barda qyrǵyzdy qýańshylyq ta, qıynshylyq ta ala almaıdy» atty taqyryppen berilip otyr.
«Ádette, Aqseleý týraly áńgimede onyń ǵylym salasyndaǵy salıqaly eńbekteri ekshelip, egjeı-tegjeı taldanyp, taratyla tarazylanady da, qalamgerlik qyry atústi, jol-jónekeı aıtylýmen shektelip júrgeni shyndyq. Al aqıqatyna júginer bolsaq, aldymen Aqseleýdiń atyn shyǵaryp, esimin elge tanytqan ádebı shyǵarmalary. Onyń jornalshydan bastalǵan shyǵarmashylyǵy uzamaı kórkem ádebıet aýylyna qońsy qondyrǵan. Bul áste áýestik emes, shynaıy shyǵarmashylyq qasıet-darynnyń jemisi edi. Іle-shala tórt birdeı kitaby jaryqqa shyǵyp, ol birden belgili qalamgerler qataryna qosylǵan. Ásirese, «Kúzeýde», «Aqqyz», «Aqıyq», «Qyz uzatqan», «Bir atym nasybaı» povesterimen týǵan ádebıetimizdiń qatary taǵy bir talantty jazýshymen tolysqanyn oqyrmandar da, ádebı orta da qýana qarsy alǵany aqıqat. Bul jerde jas jazýshynyń óz taqyrybymen, óz jazý mánerimen kelgendigin aıtý paryz», - dep jazady «Egemen Qazaqstan» gazeti búgingi sanynda. Jazýshy-ǵalym Aqseleý Seıdimbek jaıynda «Aqseleý aqıqaty» taqyrybyndaǵy maqaladan oqı alasyzdar.
***
«Aıqyn» basylymynyń búgingi sanynda «Shekten shyqqan sheneýnikter shettetiledi» atty maqala jaryq kórdi. Gazettiń jazýynsha, qońyr kúz kelisimen, Qazaqstanda memlekettik qyzmetti reformalaý bastalyp ketpek. Jazǵy demalystarynan qaıtqan depýtattar sheneýnikterge qatysty jańa zańnyń jobasyn qolǵa alady dep kútilýde. Bul reformaǵa Qazaqstan Kóshbasshysy bastamashy bolyp otyr. Osylaısha memlekettik top-menedjerlerdiń jeke shoǵyry qalyptastyrylady.
***
«Adamnyń syrt kelbeti ishki jan dúnıesine sáıkes kelgende ǵana tolyq sulýlyqqa qol jetkizetini sekildi, sáýlet óneriniń de ulttyq naqyshqa den qoıýy ultqa, elge erekshe ár beretini ras. Ókinishke qaraı, órkenıet kóshine ilesip, záýlim ǵımarattarǵa kóshken tusta san ǵasyrlardan beri uly analarymyzdyń zerttep, zerdelep jasaǵan oıý-órnekteri kózden tasalanyp, kóńilden óship bara jatyr. Bálkim, buǵan baz bireý «qazaqty qashanǵy kıiz úıge qamaı bermekpiz» dep qarsy ýáj aıtar. Alaıda ol qazaqylyqty áli kúnge arhaızm enshisine qaldyryp, jańa zamannan oǵan oryn bermeı otyrǵan kózqaras ekenin uǵynýymyz shart»,-dep jazady «Alash aınasy» gazeti. Sáýlet ónerin ulttyq naqyshqa burý turǵysyndaǵy máseleni kótergen bul maqala «Úıleremizdi ulttyq úlgide «kıindiretin» kez jetti» taqyrybymen berilip otyr.
Osy basylymnyń búgingi sanynda «Jalǵan dári-dármek satatyndardy qylmystyq jazaǵa tartý kerek pe?» atty maqala basyldy. Sońǵy ýaqytta Qazaqstannyń dári-dármek naryǵyna zańsyz engizilgen farmatsevtik ónimder týraly jıi aıtyla bastady. Tipti keıbir mamandar «jalǵan dárilik preparattardy taratqany úshin kásipkerdi qylmystyq jazaǵa tartý kerek» degen dk áńgimeler kóterýde. Jalpy, bul másele bizde nege ýshyǵyp ketti? Munyń barlyǵy dári -dármekterdi qadaǵalaýǵa almaı, onyń sapasyna baqylaý júrgizýdi bosańsytyp alǵandyǵymyzdan emes pe?
