Shekti baǵany kóterý, áseri kúshti dárilerdi retseptisiz satý – dárihanalarda jıi jasalatyn zańbuzýshylyqtar
ASTANA.KAZINFORM — Dári-dármekti asyra ústeme baǵamen satqan, sondaı-aq áseri kúshti preparattardy satýda tıisti baqylaý jasamaǵan dárihanalar qalaı jazalandy? Bul suraqqa Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti jaýap berdi.
- Dárilik zattar men medıtsınalyq buıymdardyń baǵalaryn baqylaý aıasynda Komıtettiń departamentteri osy jyldyń 6 aıynda shekti baǵalardy asyrýdyń 6 deregin anyqtady, sonyń nátıjesinde 1,4 mln teńge somasynda aıyppul salyndy, - delingen vedomstvonyń Kazinform agenttigine bergen jaýabynda.
Aıta keteıik, 2023 jyly shekti baǵalardy asyrýdyń 12 faktisi anyqtalyp, 2,1 mln teńge somasynda aıyppul salyndy. Al 2024 jyly osyndaı 7 derek (1,5 mln teńge), 2025 jyly 15 derek (3,1 mln teńge) anyqtaldy.
Nashaqorlar tutynatyn preparattardy baqylaý
«Qazaqstan Respýblıkasynyń keıbir zańnamalyq aktilerine esirtki, psıhotroptyq zattardyń, sol tektesterdiń, prekýrsorlardyń jáne kúshti áser etetin zattardyń zańsyz aınalymyna qarsy is-qımyl máseleleri boıynsha ózgerister men tolyqtyrýlar engizý týraly» Zańymen 2026 jylǵy 1 qańtardan bastap kúshti áser etetin zattardyń zańsyz aınalymy jáne olardy paıdalaný erejelerin buzǵany úshin qylmystyq jaýaptylyq engizildi.
Osyǵan baılanysty, QR Qylmystyq kodeksiniń 301 jáne 303-baptarymen kúshti áser etetin zattardyń zańsyz aınalymy úshin qylmystyq jaýaptylyq belgilengen. Bul turǵyda, 2026 jylǵy 1 qańtardan bastap Qylmystyq kodekstiń atalǵan baptary boıynsha jaýapqa tartý máselesi Іshki ister mınıstrliginiń quzyretine jatady.
Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń departamentteri 2026 jylǵa deıin kúshti áser etetin zattardy (tropıkamıd, zopıklon, tsıklomed, oksızepam jáne t.b.) retseptisiz satýdyń birqatar deregin anyqtaǵan. Máselen, 2023 jyly 48 ákimshilik hattama toltyrylyp, 6,3 mln teńge somasynda aıyppul salyndy. 2024 jyly 18 ákimshilik hattama (2,9 mln teńge aıyppul), sondaı-aq 2025 jyly 85 hattama (17,4 mln teńge) toltyrylǵan.
Buǵan deıin dári satyp alǵanda neni tekserý kerek ekenin jazǵan edik.
