«Sheksiz baýyrlastyq-III» oqý-jattyǵýy: alty eldiń arnaıy kúshteri banda quramyn joıdy
ASTANA. KAZINFORM – Kópultty oqý-jattyǵýdyń belsendi kezeńin Qorǵanys mınıstri general-polkovnık Rýslan Jaqsylyqov, Ázerbaıjan, Katar, Pákistan, Túrkııa, Ózbekstan qarýly kúshteri men Qazaqstan kúshtik qurylymdary qolbasshylyǵynyń ókilderi baqylady.
QR Qorǵanys mınıstrliginiń baspasóz qyzmeti taratqan málimetterge qaraǵanda, Túrkistan oblysynda ótken oqý-jattyǵýǵa Iordanııa men Qyrǵyzstan Qarýly kúshteriniń ókilderi baqylaýshy retinde shaqyryldy.
«Orda» oqý polıgonynda sheteldik áriptesterdiń nazaryna qarý-jaraq pen áskerı tehnıka kórmesi, sondaı-aq kıim úlgileri kórsetildi. Aǵymdaǵy jedel-taktıkalyq jaǵdaımen tanysqannan keıin praktıkalyq is-qımyldar ótti.
Alty el áskerı kontıngentterinen quralǵan birikken toptyń aldyna shekarany buzyp ótip, eldi mekenge tyǵylǵan zańsyz qarýly qurylymdy taýyp, kózin joıý mindeti qoıyldy. Sodyrlardyń ushqyshsyz ushaqtardyń kómegimen birikken áskerler tobyna soqqy bermek bolǵan áreketine radıoelektrondy soǵys quraldarymen toıtarys berildi.
Bıiktikti basyp alý úshin birikkken toptyń taktıkalyq áýe desanty túsirildi. Arnaıy maqsattaǵy bólimshelerdiń shabýylyna kamıkadze drondary men armııalyq avıatsııa shabýyldary, kvadrotsıklmen qozǵalatyn utqyr toptar qoldaý kórsetti. Ákimshilik ǵımaratqa jasalǵan shabýyldan keıin drondardyń kómegimen týnnelden ótpek bolǵan jaý kúshi tolyq joıyldy.
Qorǵanys vedomstvosynyń basshysy general-polkovnık Rýslan Jaqsylyqov oqý-jattyǵýǵa qatysýshylardy arnaıy operatsııanyń sátti aıaqtalýymen quttyqtady.
– Terrorıstik qaýipterdiń ósýin eskere otyryp, biz áskerı qaýipsizdik salasyndaǵy kúsh-jigerdi biriktire beremiz. Oqý-jattyǵýda daǵdarystyq jaǵdaıda basqarý organdary men baǵynysty bólimshelerdiń is-qımyl algorıtmderi pysyqtaldy. Birlesken operatsııany júrgizý áskerı kontıngentterdiń úılesimdi ári tıimdi áreket etýge daıyndyǵyn kórsetti, – dep atap ótti ol.
Arnaıy maqsattaǵy birikken bólimsheler kez kelgen syn-tegeýrinder men qaýip-qaterlerge tıimdi tótep berýge daıyn ekendikterin kórsete otyryp, jaýyngerlik úılesimdiliktiń joǵary deńgeıin kórsete bildi.
Oqý-jattyǵý qorytyndysy boıynsha úzdik jaýyngerlerdi marapattaý rásimi ótti. Áskerı manevrlerge barlyǵy tórt júzden astam áskerı qyzmetshi qatysty.
Osyǵan deıin Qazaqstanǵa tórt eldiń áskeri kele jatqanyn jazǵan edik.
