«Sheksiz álem»: Túrkistanda erekshe balalarǵa arnalǵan jańa jyldyq mereke uıymdastyryldy
TÚRKІSTAN. KAZINFORM — 2025 jylǵy 23 jeltoqsan kúni Túrkistan qalasyndaǵy «Rixos» qonaqúıinde erekshe qajettiligi bar balalarǵa arnalǵan «Sheksiz álem» atty jańa jyldyq merekelik is-shara ótti. Bul týraly Túrkistan oblysy ákimdiginiń baspasóz qyzmeti habarlady.
Іs-sharanyń basty maqsaty — erekshe qajettiligi bar balalarǵa qýanysh syılap, olardyń qoǵamdaǵy orny men múmkindikteriniń sheksiz ekenin kórsetý, sondaı-aq ınklıýzıvti mádenıetti damytý.
Merekelik keshke Túrkistan oblysynyń ákimi Nuralhan Kósherov, oblystyq máslıhattyń tóraǵasy Nuraly Ábishov, oblystyq máslıhat depýtattary, «AMANAT» partııasynyń oblystyq fılıalynyń basshylyǵy, quqyq qorǵaý organdarynyń basshylary, basqarma jetekshileri, úkimettik emes uıymdar, buqaralyq aqparat quraldarynyń ókilderi men 70-ten astam bala qatysty. Olar — oblystyq basqarmaǵa qarasty arnaýly áleýmettik qyzmet kórsetý ortalyqtarynyń kómegine júginýshiler.
Shara barysynda balalarǵa arnalǵan arnaıy kontserttik baǵdarlama usynyldy. Jigeri muqalmaǵan erekshe balalar óner kórsetip, kópshilikti súısindirdi. Olarǵa belgili ónerpazdar men shyǵarmashylyq ujymdar qoldaý kórsetti.
Saltanatty jıynda Túrkistan oblysynyń ákimi Nuralhan Kósherov quttyqtaý sóz sóılep, balalarǵa jańa jyldyq syılyqtar tabystady.
Óz sózinde aımaq basshysy erekshe balalardy qoldaý — memlekettiń áleýmettik saıasatynyń mańyzdy baǵyty ekenin atap ótti.
— Sizderdi kele jatqan Jańa jyl merekesimen shyn júrekten quttyqtaımyn! Sizder ómirge degen qushtarlyqtaryńyzdyń arqasynda moıymaı, mol jetistiktermen qýantyp kelesizder. Memleket basshysy erekshe balalarǵa medıtsınalyq jáne áleýmettik qoldaý kórsetý maqsatynda ońaltý ortalyqtarynyń jelisin keńeıtýdi tapsyrǵan. Búginde óńirimizde erekshe balalarǵa tıisti qoldaý sharalary kórsetilip jatyr. Oblysymyzda balalarǵa arnalǵan 5 ońaltý jáne 6 «Qamqorlyq» ortalyqtarynda 15 myńnan astam balaǵa qyzmet kórsetildi. Qurmetti jas dostar! Búgingi is-shara sizder úshin arnaıy uıymdastyrylyp otyr. Jańa jylda armandaryńyz oryndalyp, jetistikterińiz eselene bersin! — dedi Nuralhan Kósherov.
Merekelik kesh Aıaz ata men Aqshaqardyń jańa jyldyq quttyqtaýymen jalǵasty. Tanymal ánshi Qurmash Mahanov bastaǵan ónerpazdar da jurtshylyqqa kóterińki kóńil-kúı syılap, mazmundy kontserttik baǵdarlama usynyldy.