Sheksiz múmkindikterge jol ashqandardyń qatarynda «Qazaqstan» Ulttyq telearnasynyń «Jan jylýy» baǵdarlamasy da bar

Bul týraly «Qazaqstan» Ulttyq telearnasynyń baspasóz qyzmeti habarlady.

Qý zamannyń quryǵy alqymnan alyp tursa da, beıqamdyqtan aryla almaǵandar aramyzda áli de bar ǵoı. Solardyń kóbisi elimizdegi jumyssyzdardyń qataryn kóbeıtip tur. «Qazaqstan» Ulttyq telearnasy osy jaǵdaıdy eskerip, osydan tórt jyl buryn «Jan jylýy» dep atalatyn áleýmettik telejýrnal ashty. Habardyń birneshe aıdary bar. Solardyń biri «Úmit oty» dep atalady. Elimizdiń túkpir-túkpirinde, ásirese, shalǵaıda jatqan aýyl-aımaqtarda erekshe talant ıeleri bar. Jaı talanttylar emes, ózgeshe taǵdyry bar, ómirdiń bar qıyndyǵyn kórip,qaıtpas qaısarlyqpen jetistikke jetip júrgen adamdar. Ómir úshin kún saıyn kúresip, kúder úzbegen múgedek adamdarǵa apta basynda Astana qalasynda «Jan shýaq» dep atalatyn syılyq tabys etildi. Bul - jyl saıyn ótetin dástúrli shara. Igi bastamany qolǵa alǵan Qazaqstannyń múgedekter konfederatsııasy. Júldeli bolǵandardyń qatarynda bıyl «Jan jylýy» baǵdarlamasy da bar. Aqparattyq qoldaý kórsetip, múgedek adamdardyń jetken jetistikterin el aldyna shyǵaryp, elep-eskergenderińiz úshin dep alǵys aıtty. Janyn jaralaǵan qatal taǵdyryna moıymaı, ómirdi sheksiz súıetin erekshe adamdardyń shyn júregimen usynǵan osy alǵys haty ujym músheleri úshin altynǵa bergisiz baǵaly júlde. Óıtkeni, kórermenniń baǵasynan artyq syılyq joq ekeni belgili. «Jan jylýynyń» negizgi maqsaty da sol emes pe? Qashan da jylaǵan júrekterdi jubatyp, qulaǵandy demep, qýanǵannyń qasynan tabylý. Bir jyldy qorytyndylaıtyn bolsaq - «Qazaqstan» ulttyq telearnasyndaǵy «Jan jylýy» telejýrnalynyń septigimen ólim men ómir arasynda jatqan tórt adamǵa shetelderde ota jasalyp, sátti shyqty. Ata-anasynan aıyrylyp, balalar úıine tap bolǵan bes búldirshindi kógildir ekrannan kórip, óz balasyndaı baýyryna basyp, tárbıelep ósirýge nıetti ata-analar tabyldy. Túsirilimnen keıin, nazarǵa iligip, ákimdikter úı berip, qonys toıyn toılaǵandar da bar. Bul - Ulttyq arnanyń ulttyń áleýmetine qosyp kele jatqan súbeli eńbegi ekeni daýsyz.