Shekarashylardyń turmystyq-áleýmettik jaǵdaıy syn kótermeıdi – depýtat
«Shekara – Táýelsizdiktiń basty sımvoly. Qazaqstan barlyq tarappen qurlyqtaǵy jáne teńizdegi shekara syzyǵyn halyqaralyq shartpen bekitip aldy. Delımıtatsııa, demarkatsııa protsesi sátti júzege asty. Alaıda sońǵy ýaqyttaǵy álemdik geosaıası keńistiktegi túrli qubylystar kim-kimdi de oılandyrmaı qoımaıdy. Osy oraıda, men Úkimet nazaryn elimizdegi shekara bólimshelerine aýdarǵym keledi», - dedi J. Áshimjan Májilistiń jalpy otyrysynda.
Taıaýda depýtat Almaty oblysy Panfılov aýdanyndaǵy Shekara basqarmasy, Narynqol-Uıǵyr aýdanyndaǵy «Raıymbek» shekara zastavasy, Kegen aýdanyndaǵy «Saty», «Rabat» shekara bólimshelerin bastan aıaq aralap, sarbazdardyń áleýmettik jaǵdaılarymen tanysqan. Oǵan qosa, «Qastek», «Jambyl», «Qarǵaly», «Qaskelen», «Alma arasan» shekara bólimsheleri bar.
Onyń aıtýynsha, shekarashylardyń turmystyq-áleýmettik jaǵdaıy syn kótermeıdi. Arnaıy maqsattaǵy nysandardyń deni kúırep tur. Shekarashylar turatyn ǵımarattar kúrdeli jóndeýdi, kógildir otynmen qamtýdy, jaryqtandyrýdy, beınebaqylaý men elektr júıesin jabdyqtaýdy talap etedi.
«Mańyzdy nysandardy salý men kúrdeli jóndeý boıynsha Almaty oblysy ákimdigimen ortaq kelisim bar. Shekara bólimsheleriniń ınfraqurylymyn retteý jónindegi Jol kartasyna da engen, biraq másele áli sheshimin tappaı otyr. Al sońǵy 5 jylda qaýipsizdik salasyna bólingen qarjyda esep joq. Aşy da bolsa aıtaıyn, «Saty», «Rabat» zastavasynyń shekarashylary 90-jyldardaǵy eski monsha men esik-terezesi ańǵal-sańǵal balabaqshada turyp jatyr. Panfılov aýdanyndaǵy shekara basqarmasy 1892 jyly salynǵan ǵımaratqa ornalasqan. Shonjydaǵy «Raıymbek» zastavasynyń áskerıleri turatyn turǵyn-úıler men sportzal, kitaphana, májilis zalynyń tóbesinen sý aǵyp, qabyrǵalary setinep tur. Túrli qarý-jaraq saqtalǵan shekara zastavalarynyń qorshaýlaryn jaıaý adam japyryp, atty adam opyryp ótedi. Osydan keıin shekaralyq óńirlerge otbasymen baryp qyzmet etip júrgen ofıtserlik quram men áskerı boryshyn óteıtinderge «shekaramyzdy qas qaqpaı kúzetińder» dep qalaı talap etemiz? Bolashaq shekarashylardy qalaı yntalandyramyz?», - dedi J. Áshimjan.
Osy oraıda, depýtat jedeldetip myna sharalardy qolǵa alýdy usyndy.
«Birinshi, memleketimizdiń qurlyqtaǵy jáne teńizdegi barlyq shekara qyzmetteriniń materıaldyq-tehnıkalyq bazasy men áleýmettik nysandaryn arnaıy Úkimettik komıssııa shyǵaryp tekserýdi; Ekinshi, mektepterde otansúıgishtikti nasıhattaıtyn baǵdarlamalardy kúsheıtýdi; Úshinshi, taý asyp, tas basyp júrgen Almaty oblysyndaǵy shekarashylardyń áleýmettik-turmystyq jaǵdaıyn jedeldetip sheshýdi usynamyn», - dedi Májilis depýtaty.
