Shekarashylardyń qarýynan ajal qushqan balanyń isine qatysty sot otyrysy jalǵasýda

Aıta keteıik, oqys jaǵdaı osy jyldyń 8-shi aqpan kúni bolǵan edi. Oıyn balasy ákesiniń qyzmettik qarýynan ajal qushqan. Osy oqıǵaǵa qatysy bar bes shekarashynyń ústinen qylmystyq is qozǵaldy. Tergeýge ilikken bes shekarashynyń  ishinen tek  aǵa leıtenant Rahymjan Túzelov qana qamaýǵa alyndy. Ózgeleri eshqaıda ketpeý týraly qolhat bergen.
 

Osy is qaralyp jatqan Shymkent garnızony áskerı sotynda qaıǵyly oqıǵanyń qalaı bolǵany aıtyldy. Tergeý barysynda anyqtalǵandaı, sol kúni  áskerı qyzmetkerler memlekettik  shekarany kúzetý jóninde buıryq alyp, qarý-jaraqtarymen shyǵyp ketken. Alaıda olar buıryqqa baǵynbaı, óz betterinshe beketti qaraýsyz qaldyrypty. Atap aıtqanda, aǵa leıtenant Rahymjan Túzelovtiń buıryǵymen barlyǵy kishi serjant Ermahanovtyń úıine barǵan. Úıdiń bir bólmesine  tórt Kalashnıkov qarýy men qyzmettik tapanshany qaldyryp, óz sharýalarymen shyǵyp ketedi. Osy kezde kishi serjanttyń perzentteri qarýmen oınap otyryp, biri ekinshisin atyp tastaǵan. Oq tıgen bala sol jerde til tartpaı ketken. Osy jaǵdaıdan keıin bes shekarashynyń ústinen Qylmystyq kodekstiń 445 «Qazaqstan Respýblıkasynyń Memlekettik shekarasyn kúzetý jónindegi qaǵıdalardy buzý» jáne 462 «Qarý-jaraqpen, sondaı-aq aınaladaǵylarǵa qaýip tóndiretin zattarmen jáne nárselermen jumys isteý qaǵıdalaryn buzý» baptarymen is qozǵalyp, tergeý amaldary júrgizilgen.
  

Sotta qamaýǵa alynǵan shekarashy áıeliniń qatty aýyryp qalýyna baılanysty, memlekettik shekarany qaraýsyz qaldyrǵanyn aıtty. Sotta aıyptalyp otyrǵan shekarashylar óz kinálaryn moıyndap otyr. Іsti qaraǵan sýdıa Jamılıa Tólenova endigi otyrys erteń bolatynyn málimdedi.