Shekarashylar Jańa jyldy jańa páterde qarsy alatyn boldy
ASTANA. 30 jeltoqsan. QazAqparat - Jańa jyl qarsańynda Qazaqstan Respýblıkasy Ulttyq qaýipsizdik komıteti tóraǵasynyń orynbasary - Shekara qyzmetiniń dırektory general-leıtenant Nurlan Jolamanov «Batys» óńirlik basqarmasyna qarasty 2087 jáne 2036 áskerı bólimderine saltanatty jaǵdaıda jaýyngerlik týlardy tabys etti. Bul týraly QR UQK ShQ baspasóz qyzmetinen habarlady.
Namys pen erliktiń, abyroı men dańqtyń belgisi bolyp tabylatyn týlardy shekara vedomstvosy basshysynyń qolynan podpolkovnıkter Muhtar Qanabekov pen Sanat Jumanovtar aldy.
Atalǵan saltanatqa Aqtaý qalasynyń, oblystyq jáne Beıneý aýdandyq ákimdikteriniń, «Nur Otan» partııasynyń ókilderi qatysty.
«Jaýyngerlik tý degenimiz áskerı bólimniń tarıhy men erlik jolyn pash etetin qasıetti belgisi bolyp tabylady, - dep atap ótti general-leıtenant Nurlan Jolamanov óz sózinde. - Osy týdyń astynda turyp sarbazdar men sardarlar, generaldar elimizdiń táýelsizdigin, aýmaqtyq tutastyǵyn jan aıamaı qorǵaıtyn bolady».
Osy kúni Beıneý shekara otrıadynda shekarashylarǵa 48 páterdiń kilti tapsyrylǵany da erekshe atap óterlik oqıǵa. Osylaısha 4 úı paıdalanýǵa berildi. Endi «Batys» óńirlik basqarmasynyń shekarashylary Jańa jyldy jańa páterlerde qarsy alatyn bolady. Saqshylardyń ózderi de muny mereke qarsańyndaǵy eń tamasha syılyq retinde atap aıtýda.
Osy oraıda, kelesi jyly eki úıdiń paıdalanýǵa beriletindigin, osylaısha Beıneý shekara otrıadyndaǵy áskerı qyzmetshilerdiń júz paıyzy turǵyn úımen qamtylatyndyǵyn aıta ketý kerek.
Shen taqqan qyzmetshilerdi turǵyn úımen qamtamasyz etý degenimiz - Elbasy joldaýynyń iske asyp jatqandyǵynyń basty kórinisi bolyp tabylady.
Shekara qyzmeti osylaısha turǵyn úı soǵý men jóndeýdiń ekpinin arttyryp otyr, mundaı baǵyt kelesi jyly da tómendemek emes.
Ofıtserler men kelisimshart qyzmetkerleriniń jaıly da sándi páterlermen qamtamasyz etilýi kúnnen-kúnge arta túsýde. Shen taqqan qyzmetkerler janǵa jaıly barlyq jaǵdaıy jasalǵan áskerı qalashyqtarda otbasylarymen birge turýda.
Shekara qyzmeti áskerı qalashyqtar soǵýda damyǵan elderdiń tájirıbesin batyl qoldanýda. Munda áskerı bólimderge qajetti barlyq jaǵdaılar, onyń ishinde áleýmettik-turmystyq jaǵdaıdyń bolýy qatań saqtalatyn bolady. Sonda ǵana shekarashy elimizdiń qaı túkpirinde qyzmet atqarsa da, áleýmettik-turmystyq jaǵynan eshqandaı kemshilik kórmeıtin bolady.
Elimizdiń bas shekarashysy páter kiltterin tapsyra turyp, shekarashylar men olardyń otbasy múshelerin jańa qonystarymen quttyqtady, olarǵa myqty densaýlyq pen baqyt, qyzmetterine tabys tiledi.
