Shekarashylar zańsyz túrde shekaradan ótpek bolǵan ózbekstandyq otbasy múshelerin ustady
ASTANA. QazAqparat - Ótken táýlik ishinde qazaqstandyq shekarashylar memlekettik shekarany buzǵan 5 adamdy ustady. Bul týraly QR UQQ Shekara qyzmetiniń baspasóz qyzmetinen habarlady.
«Tańǵy saǵat bestiń shamasynda «Qorǵas» zastavasynyń aýmaǵyndaǵy baqylaý júıesi shyryldap qoıa berdi. Mán-jaıdy anyqtaý úshin shekara narıady jolǵa shyqty. Shuǵyl qımyldyń arqasynda shekara buzýshy adam qolǵa tústi.
Aldyn ala tergeý kezinde onyń qytaılyq azamat ekendigi, qytaı tilimen qatar aǵylshyn tilin biletindigi anyqtaldy. Odan QHR azamatynyń kýáligi tabyldy, al qolyndaǵy dorbasynan spırttik ishimdikter, uıaly telefon, dúnıe júziniń kartasy beınelengen bloknot, pyshaq, kózildirik, sporttyq kıim-keshekter men azyq-túlik shyqty»,- dep jazylǵan habarlamada.
Osy kúni elimizdiń batysyndaǵy Beıneý shekara otrıadyna qarasty «Oazıs» zastavasynyń shekarashylary zańsyz túrde shekaradan ótpek bolǵan ózbekstandyq otbasy múshelerin ustady (ákesi, sheshesi, 19 jasar qyzy men 4 jasar balasy). Ustalǵandardyń qolynda eshqandaı qujattary bolmaı shyqty.
Tergeý kezinde jaqsy jumys izdep kele jatqandyqtaryn, sol sebepti memlekettik shekarany ózderi qalaǵan jerden kesip ótkendikterin aıtty.
Atalǵan derek boıynsha quqyqqorǵaý organdary habarlandyryldy. Tergeý amaldary júrgizilýde.
