Shekarashylar «Pavlodar - Barnaýl» baǵytyndaǵy avtobýstan izdeýde júrgen adamdy ustady

ASTANA. QazAqparat - Qazaqstandyq shekarashylar izdeýde júrgen adamdy ustady, dep habarlaıdy QazAqparat QR UQK ShQ baspasóz qyzmetine silteme jasap.

Pavlodar shekara otrıadynyń «Sharbaqty-avto» ótkizý bólimshesinde ótken túnde «Pavlodar - Barnaýl» baǵytyndaǵy jolaýshylar avtobýsyn tekserý barysynda eki qazaqstandyq ustaldy.

«Olardy ustaýǵa sebep bolǵan 48 jastaǵy áıeldiń kosmetıkalyq sómkeshesindegi qońyrqaı suıyqtyq (apıyn eritindisi bolýy múmkin) toltyrylǵan 10 mg medıtsınalyq shprıts bolatyn. Shprıtsti shekarashylardyń esirtki izdeýge úıretilgen ıisshil ıt taýyp bergen. Ustalǵan áıeldi jáne onyń janyndaǵy 37 jastaǵy serigin QR Bas prokýratýrasynyń quqyqtyq statıstıka jáne arnaıy tirkeý komıtetiniń aqparattyq servısi arqyly teksergen kezde, er adam Reseı Federatsııasy Qylmys kodeksiniń 162 babynyń 2-bóligi boıynsha jasalǵan (aldyn ala sóz baılasqan top quramynda, qarý qoldanyp qaraqshylyq shabýyl jasaý) qylmysy úshin Reseı quqyq qorǵaý organdarynyń izdeýinde júrgendigi anyqtaldy», - delingen habarlamada.

Baspasóz qyzmetiniń málimetinshe, ustalǵandar Sharbaqty aýdandyq polıtsııa bólimine tapsyrylǵan.